- Само неколку дена по неговиот пораз на претседателските избори, градежната инспекција му наредила на Мило Ѓукановиќ да ги урне неговите дивоизградени објекти во Никшиќ бидејќи биле во спротивност со урбанистичкиот план.
- Му дале рок од 20 дена да ја изврши одлуката, во спротивно државата ќе го стори тоа.
- „Граѓаните, дури и оние 40 отсто што гласаа за претседателскиот кандидат Мило Ѓукановиќ, сега јасно можат да видат кој го кршел законот и колку Мило Ѓукановиќ ги почитувал црногорските институции, за кои, според неговите зборови, најмногу се залагал, наводно „бранејќи ја Црна Гора“, соопшти Демохристијанското движење.
- ФБИ и канцеларијата на американскиот обвинител во Менхетен пронашле уште над милион документи поврзани со синџирот на елитна проституција на Џефри Епстин, со неговите контакти, истрагите и со неговата смрт во затворот во Њујорк. Ќе бидат објавени по неколку недели, откако ќе бидат редактирани.
- Во два големи пакети досега се објавени речиси 130.000 страници од судски записи, фотографии, е-пошта и документи од истрагите. Овие датотеки се достапни за прегледување на веб-страницата на Министерството за правда.
- Во повеќето објавени документи не може да се види ништо, затоа што имаат повеќе зацрнети делови од текст. И новите материјали ќе бидат црнила.
- „Адвокати работат деноноќно за да ги разгледаат документите и да ги направат законски потребните редакции за заштита на жртвите. Овој процес може да потрае уште неколку недели. Ќе ги објавиме документите што е можно поскоро“, објави Министерството.
- Претседателот Володимир Зеленски во божиќната порака се помоли за мир во Украина, но и индиректно порача да умре рускиот претседател Владимир Путин, без лично да го спомне.
- „Нека умре, може да помисли секој од нас. Но, кога се обраќаме до Бога, се разбира бараме нешто поголемо. Бараме мир за Украина. Се бориме за него. И се молиме за него. И го заслужуваме“, изјави Зеленски.
- Тој ги осуди „безбожните“ руски напади со речиси 700 ракети и дронови спроти денот на кој Украинците го слават Божиќ. „Вака напаѓаат безбожните. Вака се однесуваат оние кои немаат апсолутно ништо заедничко со христијанството или со нешто човечко“, рече тој.
- Неколку часа претходно Зеленски го објави новиот мировен план, усогласен со САД, и забележа дека е спремен да разговара лично со претседателот Доналд Трамп за идејата за повлекување на украинските трупи од територијата на Донбас што сега ја контролираат. САД предложија оваа територија да биде демилитаризирана економска зона.
- Сè уште нема реакција од Русија, која инсистира да ја преземе контролата врз цел Донбас, со дипломатија или со борби.
