- Без воопшто да ја размислат дилемата на другата страна „дали воопшто имаш џип ако не го паркираш на тротоар?“ советниците на Шанса за Центар се побунија што во Дебар маало џипови непречено се паркираат на тротоар, а колички со бебиња се возат по улица.
- Бидејќи џипови на тротоар стандардно не никнуваат таму каде што нема угостителски тераси, Шанса за Центар бара тргање и на масите и столиците од јавните простори односно тротоари на Дебар маало.
- Проиранските хути во Јемен објавија дека почнуваат блокада на протокот Баб-ел-Мандеб за израелски и бродови што носат стока до Израел.
- „Прогласуваме целосна и тотална забрана за израелска поморска пловидба во Црвено Море. Сите непријателски движења ги сметаме за легитимни воени цели за нашите вооружени сили“, соопштија бунтовниците, кои контролираат регион со 80% од вкупното население на Јемен.
- Баб-ел-Мандеб е портата од Арабиско во Црвено Море, на кое Израел има брег од само 12 километри и свое пристаниште - Елијат.
- Блокадата ќе ги принуди бродовите од Азиско-пацифичкиот регион да ја заобиколуваат цела Африка за да стасаат до Израел.
- Хутите презедоа одговорност и за дел од синоќешните ракетни напади врз Израел, како одговор на израелската офанзива во Либан и бомбардирањето на Бејрут.
- Заради одбрана од руски лесни дронови, Украина поставила заштитна мрежа над патишта во вкупна должина од 1.160 километри.
- Тоа е речиси исто колку воздушната линија од Скопје до Киев.
- Државна специјална служба поставува дрвени или метални рамки покрај патиштата и преку нив распнува тешка мрежа во која се заплеткуваат квадрикоптерите и други лесни дронови. Се користат рибарски и земјоделски мрежи, како и донирани од западните сојузници.
- Во мај била поставена мрежа над патишта во должина од 210 километри, а од почетокот на годинава над 822 километри, главно во регионите близу до линијата на фронтот. Нема податоци колку дронови се „уловиле“.
- Русија лани прва почна да гради тунели од мрежа со која ги покри стратегиски важните патишта во регионот Доњецк.
