Фирма и плаќа на државна институција за услуга по тарифник, но институцијата одбива да ја даде услугата ако не се исполнат дополнителни услови, кои не им се наметнуваат на други купувачи. Веќе шест години ова е релацијата меѓу Централниот регистар и една домашна компанијата. За спорот се водат постапки пред три институции.

Фирмата се вика „Таргет груп“. Нејзини основачи се двајца млади луѓе од земјава, едниот со завршено високо образование во САД, а другиот во Словенија. Се вратиле во Македонија и отвориле т.н. „бонитетна агенција“. Како и слични компании на Запад, нудат брзи анализи за состојбата во која се наоѓа некоја фирма, па и цели пазарни сектори.

Централниот регистар му наметнува на ‘Таргет груп’ да прифати обврски дека купените податоци и информации не може да ги продава на други лица дури и во обработена форма. Тоа не значи ништо друго туку индиректна забрана за вршење на дејноста на ‘Таргет груп’. Се наметува уште една дополнителна обврска – годишните сметки, кои согласно закон се јавен податок, ‘Таргет Груп’ да прифати дека ќе бидат деловна тајна. Како може јавен податок, кој со закон е определен како јавен, да стане деловна тајна“, прашува правната застапничка на фирмата.