- Пратениците на СДСМ и ДУИ повторно решија да постапат државнички. Не дозволија да се руши меѓународниот углед на Македонија и не го прифатија предлогот на опозицијата да се продолжи рокот на важење на пасошите во кои го нема омилениот збор на власта – „северна“.
- Одважните народни избраници не слушаа што 650.000 припадници баш на тој народ вриштат – не дозволувајте да останеме во државен притвор. За парламентарното мнозинство поважно беше дали некој странец тивко ќе им рече – мора да сте кооперативни и послушни.
- Голема благодарност за тоа.
п.с. и самата ЕУ не беше категорична и соопшти дека секоја земја-членка сама решава за тоа дали ќе ги признава „спорните“ македонски пасоши или не. И тие видоа какви народни избраници има Македонија, па решија барем нешто да помогнат.
- Против Екрем Имамоглу, притворениот градоначалник на Истанбул, се покренати 142 обвиненија за корупција, за кои е предвидена вкупна казна од 2.340 години затвор.
- Обвиненијата на вкупно 3.700 страници се однесуваат на случаи за проневера, измама и перење пари. Покрај Имамоглу, уште 402 лица од криминалната организација „октопод“ се обвинети за предизвикување штета од вкупно 160 милијарди лири (3,3 милијарди евра) во изминатата деценија.
- Целта на организацијата, според обвинителите, била преземање контрола врз Републиканската партија и собирање фондови за претседателската кампања.
- Имамоглу, кој е во притвор од 19 март, ги отфрла сите обвиненија и тврди дека е жртва на политички прогон, како главен противник на претседателот Реџеп Тајип Ердоган.
- Руската амбаасдорка во Софија смета дека постапките на бугарските власти кон Лукоил се „избрзани и правно сомнителни“ и дека со законот за државно преземање на конртолата на Лукоил тие играат „многу рискантно“ и прават „опасен преседан.“
- Елеонора Митрофанова кажа дека со законот за специјален управител на рафинеријата, кој беше усвоен „брзо во две читања“, не само раководството на рафинеријата, туку и акционерите и сопствениците на компанијата ќе бидат лишено од управувачки права. Притоа, сите одлуки на управителот, вклучително и оние во врска со евентуалната продажба на рафинеријата, не подлежат на административна или судска контрола.
- „Останува да се види како ќе функционира тој закон но во моментов тоа изгледа како експропријација на туѓ имот,“ вели амбасадорката.
- Рафинеријата на Лукоил „Нефтохим Бургас“ е една од најсовремените во Европа, снабдува приближно 80% од пазарот на горива во Бугарија и извезува енергенси во соседните земји.
