Вести › Набрзинка

ЕУ го продолжи гостопримството за Украинци, но, со еден услов

15 јули 2026

ЕУ ја продолжи привремената заштита за Украинците кои бегаат од војната до 4 март 2028 година.
Новите бегалци и кандидати за привремена заштита мора да докажат дека ја исполниле или се законски ослободени од воена служба во Украина; овој услов не ги засега тековните корисници.
Доказ за воена служба или ослободување може да вклучува пасош со излезен печат од украинските власти или сличен документ.
Од март 2022 година, над 4 милиони раселени Украинци престојуваат во земјите од ЕУ.

15 јули 2026

Основното јавно обвинителство Скопје поднесе обвинение против Пеце Мирчевски, поранешниот директор на владината Служба за општи и заеднички работи во времето на претходната влада.
Се товари за злоупотреба на службената положба и овластување и за фалсификување службена исправа.
Од јули 2021 до март 2024 година, обвинетиот без никаков службен основ потпишувал решенија и патни налози за патувања во странство за себе и за неколку вработени во СОЗР.
Мирчевски го користел и владиниот авион „лирџет 60“ за приватни потреби, а сите придружни трошоци за овие патувања биле исплаќани директно од сметката на СОЗР.
Обвинетиот се товари и за фалсификување службени исправи при јавни набавки за изнајмување возила наменети за превоз на странски делегации и за транспорт на цивилно население евакуирано од Авганистан во земјава.

15 јули 2026

Новиот непалски премиер, раперот Балендра Шах (36), почна да ги испорачува предизборните ветувања дека ќе се справи со корупцијата вкоренета во администрацијата во Катманду.
Поранешниот вицепремиер Топ Бахадур Рајамаџи е осуден на 4 години затвор поради измама и учество во организиран криминал, а екс-министерот за внатрешни работи Бал Кришна Канд е осуден на две години затвор како соучесник.
Уште 14 поранешни државни службеници добија по 4 години затвор поради фалсификување документи за да им се овозможи на непалски државјани да заминат во САД како „бутански бегалци“.
Шах во март беше избран за премиер со поддршка од младата генерација, која лани крена бунт против корумпираните политичари и ги запали Парламентот, Претседателската палата и Врховниот суд. Во нередите загинаа 72 луѓе.