Вести › Набрзинка

Берлин ќе ги поткажува украинските мажи што се кријат од воена обврска

11 септември 2026

Германските власти планираат да му ги испратат на Киев адресите на украинските мажи што престојуваат во Германија, за да им бидат испратени повици за воена служба.
Во Германија тие се товар затоа што добиваат социјална помош, а на Украина ѝ се итно потребни затоа што остана без доволно војници на фронтот. Пишувавме дека само на федерално ниво, во 2025 година мигрантите ги чинеле германските даночни обврзници 24,8 милијарди евра, додека реалната сума е многу повисока.
„Знаеме кој живее овде. Кој прима социјална помош, кој е регистриран кај локалните власти, кој има статус на престој. Врз основа на овие податоци, украинската влада би можела да стапи во контакт со овие мажи и да побара нивно присуство. За ова може и треба да се разговара“, изјави германскиот министер за надворешни работи Јохан Вадефул. Притоа истакна дека процесот треба да се одвива без принуда.
Се проценува дека од вкупно 1,3 милиони украински бегалци во Германија, околу 600.000 се мажи на воена возраст.
Канцеларот Фридрих Мерц уште во ноември минатата година го предупреди Зеленски дека Германија ќе ја намали помошта за украинските бегалци, за да го запре новиот бран на миграција на млади мажи што не сакаат да бидат мобилизирани.

извор

Ангели - Демони 3:0

11 септември 2026

Во Бигорскиот манастир биле замонашени три нови монаси. Стефан, Владимир и Јован ги оставија своите световни имиња и го започнаа својот нов духовен живот како Теодосиј, Харитон и Никифор.
Свечениот ритуал (тоа да ти се викало „рамноангелски потстриг“) го започнал дебарско-кичевскиот митрополит Георгиј, ги замонашил („до олтарот ги приведе“) нивниот духовен отец и игумен на манастирот, Партениј а пееле („псалмопение“) гостите од хорот „Свети Јован Кукузел“ од Тирана.
„Нека им е за спасeние на душите, за радост на Ангелите а порази на демоните! Господи помилуј!“, порача братството од Бигорски.

извор

Хутите го стегнаа обрачот околу стратегискиот проток Баб ел Мандеб

11 септември 2026

Проиранските хути во Јемен го зазедоа стратегиското пристаниште Мока покрај теснецот Баб ел Мандеб. Ако го заземат и островот Перим, кој е нивната следна цел, ќе можат со краткострелни ракети или со морски мини целосно да го блокираат клучниот воден пат што го поврзува Црвеното Море со Аденскиот Залив и Индискиот Океан.
По оваа вест, цената на нафтата на глобалните пазари скокна на над 100 долари за барел, што е највисоко ниво по март, кога почна војната на САД и Израел против Иран.
Додека Иран речиси целосно го блокира Ормускиот теснец, низ кој пред војната поминуваа 21,6 милиони барели нафта дневно - односно 20% од глобалниот извоз, заканите од хутите го намалија обемот на извозот преку Баб ел Мандеб од 5,4 милиони барели (пред војната) на околу 2 милиони во август.
САД имаат 20 воени брода ангажирани кај Ормускиот проток и ниту еден преостанат за деблокирање на втората клучна поморска точка. Мисија за отворање на коридор низ Баб ел Мандеб би значело повлекување на бродови од Пацификот или од Европа.
Исламабад, пак, го предупреди Техеран да ги ограничи дејствата на хутите, за да не биде активиран новиот воен сојуз на Пакистан, Саудиска Арабија и Турција, што би водело кон проширување на војната.

извор