- Канцеларот Фридрих Мерц го предупредил Зеленски дека Германија наскоро ќе ја намали помошта за украинските бегалци, за да го запре новиот бран на миграција на млади мажи што не сакаат да бидат мобилизирани.
- „Младите украински мажи сè помасовно доаѓаат во Германија. Тие се потребни таму, да ѝ служат на својата земја“, му порачал Мерц на Зеленски во телефонски разговор.
- Германија прими околу 1 милион бегалци од Украина откако почна војната во 2022 година. Миграцијата повторно се засили откако Киев ја укина забраната за мажите на возраст од 18 до 22 години да ја напуштат земјата.
- Во првата недела од октомври во Германија пристигнале 1.796, а претходно доаѓале по стотина неделно.
- Кина обезбедува клучна поддршка за руската агресија во Украина и би можела да ја заврши војната со еден телефонски повик, изјави американскиот амбасадор во НАТО.
- „Пекинг би можел да му се јави на Владимир Путин и да ја заврши оваа војна утре, ако го прекине доставувањето технологии со двојна намена. Би можела и да престане да купува руска нафта и гас“, изјави амбасадорот Метју Витакер.
- Русија се потпира на Кина за набавка за критични делови и компоненти за беспилотни летала и друга воена опрема. Откако Европа воведе санкции за Москва, Кина стана и најголем увозник на руска нафта.
- Во јануари во кинеските пристаништа просечно пристигнувале по 1,65 милиони барели руска сурова нафта. Тоа е најмногу од март 2024 година и второ највисоко количество по инвазијата врз Украина пред четири години.
- Кинеското Министерство за надворешни работи ги отфрли како „целосно неосновани“ обвинувањата дека ги поддржува воените напори на Русија.
- Почина театарската, филмска и телевизиска глумица Ленче Делова, соопшти Драмски театар, нејзината матична куќа. Имаше 77 години.
- Нејзиниот талент, сценска присутност и човечка топлина оставија неизбришлива трага на сцената и во срцата на публиката. Со секоја улога таа внесуваше искреност, емоција и посветеност, градејќи ликови кои долго ќе се паметат. Нејзината насмевка и ведриот дух беа светлина зад сцената, а нејзината професионалност пример за генерации актери, напишаа колегите.
- Делова играла во 60-тина претстави во Драмски театар, а глумеше и во над 30 филмови.
