Во белгиската Про лига, во делот кој разигрува за пласман во Лига Концеренции, Гент на гости со 1-2 го совлада Стандард Лиеж и сега има 34 бода. Играч на мечот беше шпицот на гостите Гифт Орбан кој даде еден гол а на самиот старт на вториот дел проба уште еднаш лукаво да го матира домашниот голман.

Аргентинското Супер класико меѓу Ривер Плејт и Бока заврши 1-0 со гол од пенал на Мигел Борха во 90+3’ минута од судиското продолжение. После овој реализиран пенал на теренот настанал огромен хаос меѓу играчите а главниот судија поделил дури 7 црвени картони за играчи кои биле на и надвор од теренот. Ривер после 15. кола е убедливо прв со 37 бода пред Сан Лоренцо кој има 28. Бока е 13-та со 18 освоени бодови.

Питомите Финци немаат хулигански групи ни навивачки изгредници, ама затоа едно симпатично детенце на точаче им прекина натпревар па играчите го замолиле да го напушти теренот за да доиграат.

Ја реши Ријека и голот му го посвети на Адеми. На Вардарци им плати хотелски карантин. За славјето на титулата го зема мегафонот и ја запали атмосферата меѓу играчите и Бед Блу Бојс. Тоа е Стефан Ристовски, човек за кој Динамо напиша дека има силна енергија и „хулковска“ цврстина во одбрана.

Луд натпревар одиграле двата најголеми словенечки клуба, Олимпија Љубљана и Марибор во финалето на тамошниот Куп. На крајот составот од главниот град стигнал до трофејот во продолженијата со гол од пенал во 123-та минута.

Фудбалските лиги ширум Европа полека стигнуваат до самиот крај и наскоро ќе се знае конечниот пласман во секое првенство. Во меѓувреме во француската Лига1 меч од соништата одиграа Лион и Монпеље. Такво нешто не се памети.

Тоа е Неапол, градот кој живее со фудбалот и за фудбалот. 33 години го слават Марадона, човекот кој им донесе две Скудета. Кој знае колку долго ќе ги слават и јунаците на Спалети.

По ремито во Удине, шампионите се прибраа дома и ја пречекаа Фиорентина. На стадионот Диего Марадона имаше спектакл кој ќе се памети. Играчите ги најавуваа еден по еден, а шоуто го украде популарниот економ и специјалист за наполитанско кафе, Томи Стараче.

Македонската фудбалска легенда по грандиозниот пречек на „Џузепе Меаца“ во Милано, сега беше одличнo пречекан и од неговиот поранешен клуб Џенова која денес величествено прослави враќање во Серија А.

Нигерискиот напаѓач кој растури и стана голема ѕвезда во Италија, пресреќен и возбуден му вели на Балотели дека е збунет и не знае како да реагира и да се однесува во наполитанското лудило каде добива честитки од сите страни. „Направи нешто неверојатно и верувај ми дека уште не си свесен што си направил, ќе сфатиш за едно 10 години“, му вели поискусниот Марио.

Од Ла Република, преку Ил Матино до Кориере дело Спорт и Газета, десетина најчитани и реномирани печатени изданија во Италија утрово излегоа со насловни страни поврзани со титулата на Наполи, трета во клупската историја.

После 30 години кариера која му почна во Емполи 1993-та, 64 годишниот Лучано Спалети за прв пат ја почувствува магијата на Скудетото. Има две шампионски титули во Русија со Зенит, ама никогаш претходно во Италија, каде се радувал само на Куп и Супер Куп со Рома.

Со 64 години и 58 дена Лучано Спалети стана највозрасниот тренер кој освоил скудето во Серија А. Тој помина трнлив пат пред да го направи Наполи шампион.

Само неколку дена откако повторно излезе победник против Барселона после двата триумфа минатата сезоната, а одбраната против Левандовски му ја избраа во топ 5 на колото, Рајо Ваљекано пак ја истакнува стабилноста на својот гол со Димитриевски. Синоќа славеа 2:1 над Ваљадолид.

Горан Пандев и Елиф Елмас, тие се, нема други Македонци кои станале шампиони на Италија. Ако не држи добро меморијата веројатно и единствени со титула во топ 5 лигите во Европа. И двајцата заиграа за Наполи и беа дел од историското Европско за Македонија. Токму Елмас ја скрои акцијата по која Пандев го постигна тој незаборавен гол во Грузија. Секогаш имаше хемија меѓу нив двајца. 16 години помладиот Елиф го вика Горан „Бато“. Затоа честитката гласи така.

Шеесет и четири годишниот тренер на Наполи конечно го направи она што со години се обидуваше - да освои шампионска титула во Италија. И тоа со клубот кој го чекаше скудетото од сезоната 1989/1990 кога Марадона го донесе трофејот на Југот.

Елиф е во екстаза. На 23 години му успеа нешто за што сонуваат илјадници фудбалери. Ќе остане запишано во историјата: По Аргентинецот Диего Армандо Марадона, титулата со Наполи ја слави Македонецот Елиф Елмас. „Доаѓаме од мали земји како Македонија, Косово, Грузија, Словачка, Нигерија, Камерун и создаваме историја“, напиша Елмас на својот Инстаграм профил.

Додека Наполи бркаше нерешено во Удине на гости, сосема доволно за математички да ја освои титулата, вистинската фешта се спремаше на стадионот во Неапол кој крцаше до последно место. Навивачите беа во делириум кога Виктор Осимен израмни во 52 минута, а потоа спикерот го означи крајот на спектакуларен начин.

Чекаа од 1990-та и после долго исчекување го дочекаа моментот. Неапол синоќа не спиеше. Наполи и Елиф Елмас слават Скудето.

Неапол се тресе, ерупција во градот под Везув, се слави шампионска титула која што ја чекаа цели 33 години откако Марадона им ја донесе. Вечерва Наполи одигра 1-1 кај Удинезе на гости, доволно за и теоретски да го обезбеди скудетото. Прославата може да почне во градот за кој Горан Пандев даде точен опис во неколку реченици.

Готово, вече е официјално. По 33 години Наполи ја слави титулата во Серија А после двете со незаборавниот Диего Армандо Марадона од кој деновиве на големо се вејат знамиња во Неапол. По Горан Пандев 2010-та со Интер, Елиф Елмас стана втор Македонец кој успеа да се искачи на тронот во италијанскиот фудбал. Честито мајсторе.

Ако некој помислил дека Наполитанците се оладиле во недела, згрешил. Ремито со Салернитана која им даде гол во 84-та минута само го одложи славјето. Наполи вечерва од 20:45 игра на гости кај Удинезе и со евентуална победа и теоретски ќе го обезбеди скудетото кое го чекаат 33 години.

Во 5. коло од новата сезона во норвешката прва лига, Бодо Глимт со 2-0 го совлада Од и е прв на табела со 13 бода. На овој натпревар вториот гол го постигнал Амал Пелегрино, играч кој лани дал 27 погодоци на 25 меча, а сезонава веќе има 7 на 5.

Милан излезе синоќа со втор состав против Кремонезе и извади 1:1 дури во 93-та минута. Младите дефанзивци Калулу и Тиау се ушептрљаа и се посрамотија во дуел со Нигериецот Давид Окереке кој го отвори резултатот.