- На 25 август (петок) на повеќенаменското игралиште во градскиот парк во Пробиштип ќе се одржи деветтото издание на „Рудар Рок Фест“. Организаторите посочуваат дека и оваа година се обиделе да ги заживеат основните карактеристики на овој рок настан, односно хард рок музиката и промовирањето на нови бендови од македонската рок сцена.
- Ќе настапи младиот хард рок бенд „Преку ред“, кои скоро го издадоа својот прв албум, „Хаос“; прогресив-рок бендот Беседа, победници на последното издание на Лузер фест, како и нашите „Прв ред“, во нивниот препознатлив панк-рок стил. По примерот на ланската година повикан е кавер бенд Ashborn кој ќе отсвири големи хитови од историјата на рок музиката. За љубителите на тешките метал звуци за оваа година тука се амбициозните Мамут. И за крај најискусните, „Ласт експедишн“.
- Поздрав со рударското „среќно“, велат организаторите.
- Зрно фестивал годинава ја завршува со впечатлива изложба на двајца професори од Академијата за уметност од Нови Сад. Таа ќе се одржи во сабота, 6 декември, во 19.30 часот, во салата Империјал 2, во КИЦ-Скопје.
- Во единството на делата на Јелена Ковачевиќ Воргучин и Предраг Узелац се отвора расправа за природата на трагите што ние луѓето ги оставаме. Узелац ги фаќа лицата на секојдневието во сребро, во материја што тврдоглаво памти, како да го штити она што светот лесно би го заборавил без аплауз — лицата на привидно обични луѓе со скриени подвизи, водени од сопствена етика, скромно, претставувајќи контрапункт на јавното мислење и наметнатите, непроверени вредности на современото општество.
- Јелена, напротив, ги прилепува сликите за тревата, во ткиво што ја прима светлината како космичка храна, каде хлорофилот го чува споменот на мајката онолку долго колку што природата му дозволува да ја предизвикува судбината на сеќавањето. Во нивниот диптих се среќаваат две вистини: потребата и немоќта животите да се сочуваат од заборав…Среброто и тревата, постојаноста и исчезнувањето, човекот и сеќавањето — сè се среќава во вечното прашање: што од светлината останува, а што се враќа во нејзината тишина.
- Во среда, трети декември, од 18 часот, авторот Сашо Алушевски ќе постави изложба од циклусот „На Мајката земја“ – шума, во мобилната-монтажна галерија, во Паркот на франкофонијата во Скопје.
- Преку суптилна деконструкција на лисја, земја, камен и вода, сликите ја расплетуваат врската меѓу визуелното и физичкото. Материјата се претвора во знак, а фотографијата — иако фиксирана — упорно одбива да биде статична. Таа сведочи за својата ограниченост, нудејќи простор каде што претставата и реалноста се разидуваат.
- Во реализацијата се користени природни материјали и повеќе аналогни фотографски техники: цијанотипија, Ван Дајк, гумотипија и гумомаслена техника, колодиум, мордансаж и лумен процеси.
