Bookbox › Набрзинка

Јубилејно 10-то издание на фестивалот АртАреа

17 септември 2026

Десетто издание на книжевниот фестивал „ArtArea“ и четвртото издание на фестивалот на приказни за деца и млади „Крошна“ ќе се одржат од 18 до 20 септември во културниот центар Лабораториум. Под мотото „Следна станица – мир“, издавачките куќи Бегемот и Сказнувалка подготвија тридневна програма со десет промоции на книги, изложба на фотографии, креативни детски работилници, дебата за издаваштвото и џез-концерт. Влезот за сите настани е слободен.
Официјалната програма започнува во петок, на 18 септември, во 19:00 часот на Главната сцена. Првиот настан е промоцијата на романот „Ќерките на генералот“ од албанската авторка Мимоза Хиса, објавен од издавачката куќа Чудна шума. Во разговорот учествуваат Билјана Црвенковска и Јордана Шемко-Георгиевска. Вечерта продолжува во 20:00 часот со претставување на новиот роман на Пајо Авировиќ насловен „Пат за Бутан“, во издание на Бегемот, за кој авторот ќе разговара со Ѕвездан Георгиевски. Во 21:00 часот на истата сцена следува промоција на македонскиот превод на романот „Теренски истражувања на украинскиот секс“ од украинската писателка Оксана Забужко. На промоцијата за книгата ќе говорат Катерина Шекутковска, самата авторка и Ивана Јовановска.

Целосната програма и за 19-ти и 20-ти септември на линкот

извор

Изложба „Раселени“ на Тања Балаќ во МАНУ

15 септември 2026

Изложбата „Раселени...Фрагменти од сеќавањето“ на Тања Балаќ ќе се отвори на 16.09.2026 (среда) во 20 часот. Таа произлегува од долгогодишното истражување на темата на мигрантската криза, раселеноста, но сега повеќе се поместува кон она што останува во човекот откако ќе исчезне местото што го нарекувал „дом“.
„Не ме интересира само човекот кој е принуден да замине, туку и она што тој го носи со себе - сеќавањата, сликите, фрагментите, стравовите, блискоста, отсутните луѓе, просторот што повеќе не постои на истиот начин. Можеби токму затоа и зборот фрагменти ми е важен. Сеќавањето никогаш не е целосна слика. Тоа секогаш е составено од делови.“ - вели авторката во интервју за УМНО (на линкот).

извор

78-мото издание на наградите Еми со историски моменти

15 септември 2026

Медицинската драма „Д Пит“ ја освои наградата за најдобра драмска серија на 78. доделување на „Еми“, кое се одржа во раните утрински часови на 15.09. по македонско време во Лос Анџелес. Серијата, која минатата година исто така беше прогласена за најдобра во драмската категорија, го повтори успехот и во 2026 година. Нејзиниот главен актер, Ноа Вајл, освои награда за најдобар актер во драмска серија.
Меѓу останатите добитници во драмските категории се најдоа Риа Сихорн, која го освои својот прв „Еми“ за главна женска улога за „Плурибус“ (уште ѝ должат за „Бетер кол Сол“), и Том Пелфри, награден за споредна машка улога во серијата „Таск“. Алисoн Џени, пак, ја освои наградата за споредна женска улога за „Дипломатот“.
Најголемото изненадување на вечерта беше серијата „Видоус беј“, која ја освои наградата за најдобра комедиска серија. Таа освои шест награди во главната церемонија, со што се издвои како еден од најголемите победници на годинешните „Еми“. Метју Рис ја освои наградата за најдобар актер во истата, додека Кејт О’Флин и Стивен Рут беа наградени за споредни улоги. Серијата освои и признанија за сценарио и режија.
Џин Смарт освои „Еми“ за најдобра актерка во серија од жанрот комедии за улогата на Дебора Венс во „Хекс“. Ова е нејзина петта последователна победа во истата категорија за оваа улога, што претставува историски успех. Метју Рис оствари исклучително достигнување, освојувајќи награди во две главни актерски категории во текот на истата вечер. Покрај наградата за комедијата „Видоус беј“, тој беше награден и за главна машка улога во ограничената серија „Ѕверот во мене“. Со тоа стана првиот кој во една иста година освоил „Еми“ за главна актерска улога и во комедија и во мини серија.

извор