Најверните читатели знаат дека ја следиме секоја промена во делото ORGAN²/ASLSP („Колку што е можно побавно“) на американскиот композитор Џон Кејџ, коe треба да трае неверојатни 639 години. Во германскиот град Халберштат неодамна (среда, 5.7.) беше извршена нова промена во звучната слика. Ова е само 17-та промена на акорд од почетокот на изведбата и означува околу четири проценти од целиот проект, кој треба да заврши дури на 4 септември 2640 година.
Иако проектот започна во 2000 година, самата изведба почна на 5 септември 2001 година, на 89-от роденден на Џон Кејџ. Наместо музика, првите речиси една и пол година поминаа во тишина. Дури на 5 февруари 2003 година се слушнаа првите акорди.
Органата работи со електричен систем што постојано внесува воздух во цевките, овозможувајќи звукот непрекинато да трае со години. Кога ќе дојде време за нов акорд, организаторите рачно додаваат или отстрануваат цевки, со што се менува звучната слика.
На последната промена присуствувале повеќе од 150 луѓе, додека многумина настанот го следеле преку видеопренос. Посетителите најнапред неколку минути го слушале стариот акорд, а потоа, по поставувањето на новата цевка, внимателно го впивале новиот звук. По кратката церемонија, просторот одекнал од аплауз и извиците „Браво!“.
За организаторите, ова не е само музички проект, туку и потсетник дека уметноста може да постои надвор од вообичаените рамки на времето. Во свет во кој сè се менува со огромна брзина, концертот во Халберштат нуди ретка можност човек да застане, да слуша и да го доживее минувањето на времето на сосема поинаков начин.
