Фајнал фор на женската ЛШ:

Вардарки одат кон трета среќа

Ракометарките на Вардар го добија најлесниот противник на ждрепката за Ф4 во Будимпешта. Историско финале во Лигата на шампионите ќе бркаат против ЦСМ Букурешт.

Финалниот турнир ќе се одигра на 7. и 8. мај во Будимпешта, а титулата освоена лани ја брани црногорскиот тим Будуќност. Инаку ова е трета година по ред Фајнал форот да се игра во салата Пап Ласло главниот град на Унгарија.

За македонскиот шампион Вардар ова ќе биде трет Фајнал фор по ред во Лигата на шампионите. Минатата година Вардарки убедливо загубија во полуфиналето од Будуќност 27-17, а во сезоната 2013/2014 црвено-црните од Црногорките загубија 22-20.

Парови на Ф4 на ЛШ:
ЦСМ Букурешт - Вардар
Будуќност - Ѓер

Термините на одигрување се од 15:15 и од 17:45 часот.

Будуќност

Будуќност минатата година во финалето го совлада Ларвик со 26-22 и стана европски шампион. Шампионот на Црна Гора во првата фаза сезонава заврши првопласиран со 11 освоени бода, пет победи и само едно реми и тоа против Букурешт, новиот учесник на Фајнал Фор годинава.

Во втората рунда, Будуќност беше во групата 2 и заврши како првопласиран со дури 15 бода од 7 победи, 2 порази и 1 нерешен исход. Загубија од Ѓер на гости и од Вардар во Скопје. Во четвртфиналето Будуќност го совлада романскиот Баја Маре на два пати, 29-24 и 32-25.

Ѓер

Унгарскиот дрим-тим минатата сезона беше елиминиран токму од Вардар во четвртфиналето. Унгарките се враќаат на Фајнал форот во борба за трофејот откако сезонава во групата Ц (заедно со Вардар) беа први со 9 бода, 4 победи, 1 пораз и 1 реми.

Во втората фаза, Ѓер заврши втор со 15 бодови колку што имаше и првиот Будуќност. Учинокот на унгарскиот состав во главната фаза од ЛШ беше 7 победи, 2 порази и 1 нерешен исход. Во четвртфиналето лесно поминаа против нивните сонароднички од клубот ФТЦ.

Букурешт

Романскиот шампион сезонава ја потврди ренесансата на романскиот женски ракомет кој конечно се врати таму каде според остварените резултати му е место, во елитата. За ЦСМ Букурешт ова е прв пласман на еден Фајнал Фор.

Во првата фаза од ЛШ Букурешт беше во групата Д, таму завршија втори со 9 бодови, 4 победи 1 пораз и 1 нерешена средба. Во втората фаза беа во групата 2 и таму одиграа нешто послабо, беа четврти со 9 бода од 4 победи, 5 порази и едно реми. Последна пречка пред Фајнал форот им беше Ростов Дон кој на два пати го совладаа идентично и тесно со 26-25.

Тагови: