По воведниот пораз од Словенија, па загубениот меч од Црна Гора во второто коло, вечерва нашите најдобри ракометари убедливо изгубија од комбинираниот состав на светската ракометна сила Данска: 31-21.
Данскиот селектор реши да ги одмори водечките ракометари, но тоа не и претставуваше проблем на скандинавската земја да оствари убедлив триумф.
Единствена светла точка од овој меч е младиот Митев кој влезе во составот на Македонија наместо Маџовски и успеа да стекне искуство од едно големо Европско првенство.
Мечот неочекувано започна со убедлива, висока предност на црвено-жолтите од 4-0 со головите на Костески, Талески и Жарко Пешевски.
Митревски бранеше во свој стил, одлично, Хансен промаши седмерец, а Данците првиот гол го дадоа дури во деветтата минута, што сигурно првпат им се случува во последните децении.
Високиот и тешко задржлив Керкеле доминантно постигна два гола и Данска веќе на истекот на 13' минута намали на 4-3.
По одличниот почеток, Филип Кузмановски незгодно нагази при еден доскок и го повреди зглобот па мораше предвреме да излезе од игра.
После тој момент нашиот тим цели шест минути не постигна гол, па селекторот Лазаров реши после повикан тајм-аут да ротира и го стави Миркуловски со цел да застанеме на топка.
Но веќе беше доцна. Данците „се размавтаа“ и Ландин во 23' минута ги однесе на +3 гола предност.
Тогаш шанса доби дебитантот Марко Митев, а Никола Митревски постигна гол од својот простор за воодушевување меѓу нашите навивачи.
Првите триесет минути завршија 15-11 за Данска.
Почетокот на вториот дел донесе идентична слика - Македонија пробуваше да парира, но сепак Данска која е меѓу главните фаворити за злато, не дозволуваше ни најмал сомнеж околу конечниот резултат. Единствено добро е што некои нови клинци како Митев, Иван Ѓоргиев и Кристијан Симоновски добија прилика да почуствуваат како е да се игра против големата Данска.
На крајот пораз од 10 гола разлика: 31-21 и крај на бајката Европско првенство за нашиот национален тим.
Најрасположени стрелци кај нас беа Пешевски со шест гола, Мишевски и Талески постигнаа по три, а Велковски и Кузманоски броеа по 2 гола.
Најефикасен на мечот беше корпулентниот Киркелоке со девет погодоци, Линдберг постигна четири а Менсинг три. Никола Митревски запиша шест одбрани а Мартин Томовски само една.
