По патешествието во Норвешка и гостувањето во Охрид, Металург денес одново играше на гостински паркет, во Романија натпревар од петтото коло на ЛШ. По половичниот успех после триумфите над Елверум и Шафхаузен и поразите од Мотор и Скјерн, Металург не успеа да освои бодови против Баја Маре.
Одбраната, како препознатлив знак на Металург под водство на Червар функционираше сосема пристојно на стартот од мечот и Металурзите беа во резултатски егал. Од друга страна, нападот скромен и неефикасен за што покажа и само едниот гол за цели 10 минути во првиот дел.
До првата сериозна предност, Романците стигнаа во 20-та минута од првото полувреме кога поведоа 9-6. Сепак, Металург прибрано ги одигра последните пет минути пред паузата и намали на 10-9, резултат со кој се замине на полувреме.
Домаќините се обидуваа да се одлепат резултатски на стартот од второто полувреме, но тимот од Автокоманда не се предаваше и враќаше на секој гол на Баја Маре. Резултатската клацкалица и одличниот голман Даниел Дупјачанец му овозможија на Металург напад во финишот за бод, но со 18-та загубена топка при неспретниот напад на Лука Мраковиќ, домаќините ја сочуваа победата. Следуваше големо славје на околу 4.000 домашни навивачи.
Даниел Дупјачанец имаше 17 одбрани, 3 одбранети пенали од вкупно четири на Баја Маре. Јанко Божовиќ беше најефикасен кај Металург со 8 погодоци. На табелата, Скјерн е прв со 8 бодови пред Баја Маре со 6. Металург е четвртопласиран со 4 бодови од 5 натпревари.
Баја Маре е следниот противник на Металург, на 25. октомври во реванш дуелот во Скопје.
