Скоро 3 минути беа потребни да се скрши мразот на мечот, а тоа го стори нашиот капитен од седум метри. Македонија тргна многу самоуверено и решително по голот на Босанците и направи предност од 4:0
Ракометарите на БиХ за прв пат реализираа во седмата минута, но направија неколку технички грешки и тоа го платија со негатива од 6:1 во 10 минута. Најрасположен во нашиот тим на почетокот беше Миркуловски кој постигна 3 гола.
Избраниците на Обрван имаа криза во играта и не успеаа да постигнат гол неполни 10 минути. Босанците влегоа во ритам и со серија од 5:0 го израмнија резултатот. Во последните 10 минути се играше попретпазливо и неизвесно.
На 5 минути до крајот на првиот дел пристигнаа првите погодоци на Наумче Мојсовски кој погоди два пати за +3, но БиХ со играч помалку, по второто исклучување на Јоноски реализираа два гола во низа. На полувреме заминавме со предност од 13:11.
Вториот дел донесе потврда игра без голема ефикасност, а ниту една од селекциите не успеваше да најде начин за да се одлепи резултатски. Босанците постигнаа два гола и го израмнија резултатот, а потоа се играше гол за гол се до 44 минута кога бевме во негатива -1.
Недостасуваа головите на Кире Лазаров кој по првите 50 минути имаше само еден гол и тоа од пенал, а потоа првиот погодок на средбата го постигна Вугринец. По него два гола во низа реализираше Прибак за пресврт и водство на Македонија од 21:19.
Предноста од два гола ја одржувавме и натаму, на Лазаров не му одеше од игра, но погоди уште два пенали. Клучните голови за победа Македонија ги постигна најпрвин преку Вугринец за +3 во 56 минута, а потоа повторно погоди Немања Прибак за враќање на истата предносст во 58-та.
Македонската ракометна репрезентација не блесна во играта и многу тешко стигна до трета победа со резултат 25:22, но првата цел е веќе остварена, а тоа е осминафинале.
Најпрецизен во нашиот табор е Дејан Манасков со 6 голови, а Лазаров, Мојсоски и Прибак постигнаа по три.
Четвртата пречка е Хрватска, меч кој се игра во среда со почеток од 17 часот.
