Спарси уште од стартот остварија водство кое постојано го одржуваа и покажаа поголема желба за триумф на овој натпревар. На стартот од втората четвртина веќе имаа двоцифрена предност која не дозволија противникот драстично да ја намали.
Високиот процент на шутеви овој пат со 57% повторно беше главното оружје на гостите, исто како и цврстата одбрана со која целосно беа затворени Крис Бош и Двејн Вејд кои одиграа ретко виден блед меч во плејофот.
Со 20 поени 14 скока и 3 асистенции Каваи Леонард исто како и на претходниот меч беше клучниот човек за високиот триумф од 107:86, а најголема помош доби од Паркер кој уфрли 19 и Пети Мис кој постигна 14 поени.
За одбележување на овој натпревар е двојниот подвиг на Тим Данкан кој влезе во историјата на НБА лигата со најмногу одиграни минути во пјеофот и успеа да го мине легендарниот Карим Абдул Џабар. Крилниот центар на Спарси со 10 поени и 11 скокови стигна и до 156 дабл-дабл повеќе и од Меџик Џонсон.
Следната пресметка е закажана за в недела кога домаќинот Сан Антонио ќе има можност за славје пред своја публика.
