Според очекувањата, Фени Индустри имаше лесен тренинг со Кожуф во четвртфиналниот дуел од кошаркарскиот куп.
Кавадарчани доминираа уште од самиот старт и на крајот славеа со високи 95:63.
Најефикасен кај Фени беше Дарко Соколов со 19 поени, додека во тимот на Кожуф најдобар беше Александар Димитровски со 18 поени.
Најинтересниот четвртфинален натпревар помеѓу Лирија и Куманово започна со инцидент кој се случи за време на интонирањето на македонската химна. Навивачите на Лирија ја проследија химната со свиркање, а потоа во текот на целиот натпревар двете навивачки групи разменија повеќе навреди на национална основа.
По неизвесен натпревар, победникот беше решен во последната минута кога Лирија влезе со поен предност, а кошаркарите на Куманово пропуштија две шанси за пресврт.
Лирија на крајот славеше со 90:85, а најефикасни беа Карлос Морбан, Тони Симиќ и Балша Радуновиќ со по 21 поен. Кај Куманово најдобар беше Урош Луковиќ со 22 поени и 16 скокови.
Во сабота на програмата на кошаркарскиот Куп на Македонија се полуфиналните натпревари каде во 17 часот играат МЗТ - Торус, а во 20:30 ќе се сретнат Фени и Лирија.
