Златната топка во рацете на Осман Дембеле

Франција доби нов крал во Париз. Дембеле е шестиот фудбалер од оваа земја која стана рекордер по број на освоени златни топки.

Осман Дембеле е добитник на најпрестижната фудбалска индивидуална награда која со децении ја доделува Франс фудбал. Се најде во скапо друштво на сонародници.

Пред него Златната топка ја освојуваа Рајмонд Копа, Мишел Платини, Жан Пјер Папен, Зинедин Зидан и Карим Бензема. Франција сега е рекордер со шест освојувачи, по Германија и Италија кои имаат по пет.

Најголем ривал во битката му беше Ламин Јамал кој сепак заврши на втората позиција според бројот на гласови. Во топ 5 се уште и Витиња, Салах и Рафиња.

Од играч со неконстантна форма и нестабилен карактер, Дембеле се претвори во лидер на ПСЖ со кој одигра врвна сезона и заврши како прв стрелец.

Постигна 35 гола и имаше 16 асистенции на 53 настапи и освои четири трофеи меѓу кои и Лигата на шампионите, прва во историјата на клубот.

Наградата му ја врачи Роналдињо, а тој се расплака за време на говорот.

„Искрено, малку сум под стрес. Ја добив оваа награда од една од најголемите легенди на сите времиња, не можам да поверувам. Ова е награда благодарение на тимот. Сакам да им се заблагодарам на сите мои соиграчи. Сакам да ѝ се заблагодарам на Барселона, клубот од моите соништа. Играв со Лионел Меси, сакам и нему да му се заблагодарам, научив толку многу од него. Сакам да му се заблагодарам на Дешамп. Да се надеваме дека ќе можеме да го освоиме и Светското првенство.“