Тимот од провинција кој се прослави на голема сцена

Како и стотиците шпански градови, и Миранда де Ебро има некој неповторлив шарм со река која го дели стариот и новиот дел на градот и неколку црквички кој се изградени на мал простор.

 

Од корист во пронаоѓањето на ова место може да ви се најде географкската положба на градот кој се наоѓа меѓу три автономни заедници - Кастиља и Леон, Ла Риоха и Баскија. Главно е дека жителите на ова место го сакаат својот град и знаат да уживаат добро во виното.

 

Подеднакво го сакаат и фудбалот. Се задоволуваат со мешаниот успех на својот клуб Мирандес, екипа која цел живот е во четврта лига и има кратки излети во Сегунда Б (шпанската трета лига). Пресвртот се случил во сезоната 2011/2012 кога Мирандес ја освои Сегунда Б и влезе директно во втората лига.

 

Овој успех на Карлос Поусо и неговиот тим како да не им беше доволен па тргнаа по сензација. Мирандес стигна до полуфиналето на шпанскиот Куп! Во главниот ждреб, второлигашот лесно ги минуваше Виљареал, Расинг и Еспањол.  

Последниот двомеч против Еспањол таа 2012-та беше епски. На пет минути пред крајот Мирандес водеше 0:2 на гости, но загуби 3:2 на крајот. Во реваншот беше 1:1 до 93-та минута кога Канеда додека рефлекторите почнаа да се гасат, го однесе Мирандес во полуфиналето на Кралскиот куп. Општ делириум на малото стадионче и целовечерна прослава во градот.

 

Крајот на оваа бајка не беше далеку. Мирандес налета на Атлетик Билбао кој славеше со вкупни 8:2. А кога колата тргнува надолу, нема враќање, па така Мирандес поради Купот го запостави првенството, заврши на фаталната 19-та позиција и се врати во третата лига.

Сепак шпанската лига реши да ја исклучи Мурсија од Сегунда поради административни нерегуларности и Мирандес автоматски остана во втората лига. Пред стартот на 2014/15, Мирандес беше аутсајдер, но на крајот заврши на 8. место што беше историски успех за малиот клуб.

Полека стигнавме до тековната сезона, во која Мирандес има шанси да го оствари најголемиот успех во клупската сторија и да заврши на место кое води во плејоф борба за Примера. Од друга страна, момците на тренерот Карлос Терасас беа на прагот да го повторат успехот во Купот од пред четири години.

Иако во 2. коло загубија од Осасуна 1:2, кога тимот од Памплона го славеше пласманот понатаму, на Твитер се појави информација дека за нив играл суспендиран играч (Унаи Гарсија). Шпанската федерација го поништи резултатот и ја исфрли Осасуна од Купот, а Мирандес продолжи понатаму.

Враќањето на голема врата во Купот значеше и нов подвиг на Мирандес. Го скршија отпорот на Овиедо во продолжението, а тогаш покажаа и смисла за хумор. Во ноември кога на големо се зборуваше дека Роналдо ќе оди во ПСЖ, тие објавија на Твитер фотографија на која се гледа Меси во нивниот дрес и напишаа дека тој доаѓа кај нив.

Патот кон сензацијата Мирандес го продолжи со одличен фудбал. Како крушки пред нив паѓаа Малага, Расинг и Депортиво Ла Коруња. Особено последниве беа доследно понижени на Риазор со 0:3 кога целиот стадион му аплаудираше стоечки на тимот од провинција.

Сепак во четвртфиналето налетаа на Севиља која ги победи со вкупен резултат 0:5 и така го сруши сонот на малиот тим со големо срце. Меѓутоа овој неуспех не се смета како крај на приказната, туку само како крај на едно поглавје. Терасас и екипата имаат големи планови за во иднина, а ние немаме причина да не им веруваме. Hala Mirandes!