Без неколку стандардни првотимци, македонските фудбалери направија првокласна сензација. Победа над Италија пред преполн стадион во Палермо.
Нова епска сензација на Македонија, четирикратниот светски првак е на колена
Македонија сега во вторник игра против уште еден гигант, Португалија. Но после чудото во Италија, никој не размислува на тоа што следува. Селекторот Благоја Милевски на прес-конференцијата после мечот изјави:
„Горд сум на овие момци. Многу сум среќен, горд. Ја победивме Италија на италијански начин. Еден гол од два шута!“
„Не беше во план да играме вака и да упатиме само два удари кон голот. Но игравме против актуелниот европски првак и да се победи ваква селекција не е мала работа. Италија во моментов е најдобра европска репрезентација.
Оваа Македонија не се ориентира само на одбрана но ривалот беше пеколен. Драго ми е што Трајковски имаше одлична партија во својот дом и ја круниса со гол.
Ние не застануваме тука, ни следи последниот чекор пред пласман на Светско првенство. Драго ми е кога се смета за неуспех кога играме нерешено против Ерменија, Романија и Исланд. На добар пат сме да потврдиме зошто сме меѓу најдобрите дваесет репрезентации во Европа“.
Македонската репрезентација утре околу 18:30 часот би требало да стигне во Скопје, а веќе во недела полетува за Порто, на мегдан кај уште еден гигант.
Последните 2 минути и судискиот свиреж за делириум на Ренцо Барбера
