Од 2010-та сме немале ваков пласман на рангот на ФИФА

По четирите освоени бодови на стартот на квалификациите за ЕП 2020, македонската фудбалска репрезентација бележи скок од три места на ранг листата на ФИФА.

Според најновото рангирање на ФИФА Македонија е 68-ма фудбалска земја во светот, позиција која ја имаше во 2010-та година.

Момците на Игор Ангеловски успешно ги стартуваа квалификации за Европското првенство кое се игра следната година. Славеа против Летонија, а потоа освоија важен бод на гости против Словенија.

68-ма позиција ја делиме со селекцијата на Гвинеја, а пред нас се Обединети Арапски Емирати, Брегот на слоновата коска, Мали, Боливија..

Најдобриот историски пласман е оној со Среќко Катанец кога во 2008-ма година се наоѓавме на 46-та позиција. За да се брка повторно такво нешто потребни се победи против поголеми од нас, како на пример Полска и Австрија со кои играме во јуни.

Инаку од нашата квалификациска група подобри се Полска (20), Австрија (34) и Словенија (63), а под нас се Израел (84) и Летонија (134).

Во топ 10 се Белгија, Франција, Бразил, Англија, Хрватска, Уругвај, Португалија, Швајцарија, Шпанија и Данска.