„Лудакот" Марсело Биелса со Атлетик Билбао немаше најдобра сезона во шпанската Примера. Билбао се наоѓа на средината на табелата во Шпанија и единствен услов за екипата повторно да се натпреварува во Европа следната година е да триумфира на вечерашното финале.
На патот до финалето Биелса го надмудри Алекс Фергусон и целосно го надигра Манчестер Јунајтед, а ги елиминираше и Шалке и Спортинг од Лисабон. Но во финалето нема да има лесна задача затоа што против себе го има Атлетико Мадрид чиј предводник е Диего Симеоне.
Симеоне добро го познава својот поранешен учител. Марсело Биелса ја предводеше репрезентацијата на Аргентина и тие настапуваа заедно цели четири години, па Диего Симеоне сигурно добро ги знае сите методи, техники и тајни на Биелса.
Атлетико Мадрид одигра солидна сезона во шпанската Примера, а во Лига Европа имаат импресивна серија од 11 победи меѓу кои и оние од дуелите со Удинезе, Селтик, Лацио, Бешикташ, Хановер и Валенсија.
Во минатото овие две екипи се имаат сретнато 150 пати, но ниту еднаш во европско натпреварување. Атлетико Мадрид има извојувано 64, а Атлетик Билбао 59 победи.
Тешко е да се предвиди победникот на ваков дуел, но двете екипи негуваат напаѓачки фудбал, па сигурно е дека вечерва ќе гледаме одлична фудбалска претстава со повеќе голови.
