Според швајцарскиот весник Швајц ам Зонтаг кој цитираше неименувани извори, Блатер размислува да се врати во игра по поддршката која што ја доби од Африка и Азија. Ваквиот развој на настаните го поттикна Доменико Скала, блискиот соработник на Блатер да го потсети 79-годишниот Блатер дека не треба да го крши дадениот збор.
„За мене, реформите се централна тема. Поради тоа мислам дека е неопходно да се продолжи процесот на најавената смена како што беше објавено“, изјави Швајцарецот со италијанско потекло Скала, кој и самиот конкурира за претседател на ФИФА на претстојните избори.
Извршниот комитет на ФИФА ќе преседава на 20. јули, кога треба да се знае датумот на следните избори. Инаку ова не е прв пат Блатер да зборува едно, а да прави друго. Во 2011-та Блатер истакна дека нема да се кандидира за уште еден мандат до 2015-та година. Но во 2014-та, тој изјави дека „мисијата не е завршена и мојата мисија не е завршена“ и повторно го избраа за претседател на ФИФА. На 2. јуни годинава, Блатер изјави дека ќе се повлече, но сега се премислува.
ФИФА западна во сериозен скандал кога се открија и уапсија 14 високи раководители на фудбалската унија, дента кога во Цирих одржуваа конгрес. И покрај откритијата за мито и корупција, Блатер повторно ја доби поддршката и го победи противкандидатот Принцот Али бин-Хусеин. Блатер доби 133 гласа, а Принцот Али доби 73.
