Off Topic

Некои луѓе имаат време. И тонер.

Еден обожавател на филмската франшиза „Дина“ испечатил 240 постери со кадри од својот омилен филм и ги поставил по прецизен редослед покрај еден пат. Зошто? За кога некој ќе помине со возило покрај овој дел со одредена брзина, статичните слики покрај патот да му се спојат во течна анимација и „да му направат филм“. Океј.

Водич за пиење од Леми Килмистер

Уште во 2005 година, пејачот и фронтмен на Моторхед, Леми Килмистер, во интервју даде неколку тешко стекнати совети за пиење алкохол. Тој отсекогаш важеше за исклучително веродостоен извор по ова прашање. Има тука неколку интересени цаки.

Новиот српски парламент има пратеник со боенка

Во новиот состав на парламентот на Србија има осум глумци, пола од кај студентите, пола од кај Вучиќ. Еден од кај студентите е и актерот Бојан Димитријевиќ, познат како наркоманот Пикац од серијата „Вратиће се роде“. На првиот ден на новата работа земал боенка, за кога ќе му биде досадно. Симпатично, ако човек заборави дека се колнеа како 24/7 неуморно ќе се борат со криминалниот октопод на претходната власт.

„Подобрата Србија“ демонстрира простаклук

Група победнички бадијалџии се собраа пред зградата на српскиот парламентг каде се одржува конститутивна седница на новиот парламентарен состав. За да им аплаудираат на своите и да викаат „уаа“ на другите (јаки потези, јаки герили). Најглупата меѓу нив ја потури со јогурт по глава актерката Лидија Вукиќевиќ која има мандат од СНС.

ВИ музиката ги доби своите Греми

Во Лос Анџелес биле одржани првите AI Music Awards за музика креирана со вештачка интелигенција. Распоредени во 25 музички жанра и три категории: скроз ВИ, делумно ВИ и хибридни песни во кои вокалот е на клониран човечки глас. Влез за настанот бил 250 долари. Ги имаме победниците. Некако ни немаат душа :)

Политичар е за да те фарба

Во 2021 година, локални политичари во изборна кампања решаваат да им покажат на своите гласачи дека тие се луѓе од народот па наместо само ветувања, да демонстрираат дека се подготвени конкретно да им помагаат на луѓе. На пример, да освежат со боја фасада на една скромна куќа, па удираат ваљак, се разбира, пред камери и новинари. Да ја видите куќата пет години подоцна.

Како се познаваат свои луѓе

Многу луѓе од многу земји откриваат како препознаваат нивен сонародник во интернационални друштва. Спојлер: нас нè нема. Штета, а баш не занимаше што би можело да биде.

Туристичка атракција што не мора да ја посетите

Се наоѓа на планина во Непал, и атракцијата е што се возиш по пат кој постојано е поплавен од вода од водопадот над што е над него. И сето тоа покрај провалија. И на удолница.

Советски брејкинг њуз: Ози Озборн и Чорни Шабаш

На руска телевизија од советско време (годината е 1972) на младината им се објаснува Ози Озборн и Блек Сабат. За таканаречениот рок колектив Чорни Шабаш се вели дека „проповедаат насилство и религиозно мракобесие“ (?!) а солистот Ози Озборн го залупаа како „класичен пример за нарушено психичко здравје“. 

Видео есеј за тоа како видео есеите знаат да те мамат

Многу е лесно, не се што ќе видите спакувано како видео е точно, има и такви што лажат или па не се доволно информирани или па и двете. Нормално има поштени и објективни. Само треба да бидеш претпазлив во што веруваш и со какви линкови ги замараш блиските, вклучително и ова видео.

Утоп црвено

Кинези тестираат систем кој треба да ги научи пешаците да поминуваат на семафор. Штом некој тргне на црвено, го шприца со вода. Хмм. Кај нас одма ќе извадат муабет дека тие ступчињата пуштаат кемтреилс.

Салто назад од седење

Дечкото даде сè од себе да ни објасни како тоа се прави. А ние дадовме сè од себе да го разбереме. И ете нè, него и нас, после видеото, пак секој по својот пат.

Не бе, на тебе не ти го бива кираџијата

Американски сопственици на стан / куќа, влегуваат во својот објект некое време откако им го снемува кираџијата. Не е мртов, само не знаат дали е во болница или на некаков, каков било, вид лечење.

Како изгледа најефикасното аеродромско обезбедување на светот

Нормално од Израел е, од меѓународниот аеродром во Тел Авив, и функционира на повисоко ниво од сè останато во светот. Освен технологија стандардно присутна во сите аеродроми, системот доминантно се базира на вонредно добро обучен кадар.

Молба за работа: Живеам со свекрва...

Да, живеам со свекрва веќе 10 години и се согласуваме феноменално. Ако тоа не ви зборува дека сум тимски играч, не знам што ви зборува.

Што е следно за камерата во телефонот?

Длабочини, просторно мапирање, уфрлување виртуелни објекти во стварноста и интеракција со нив. Со други зборови, ќе одиш како будала и ќе ја шамараш рибата.

Oригиналната верзија на Nothing Compares 2U

Во соработка со Ворнер брос, оние кои располагаат со музичката оставштина на покојниот Принц решија да ја обелоденат досега неслушнатата оригинална верзија на оваа песна, напишана, аранжирана, отсвирена и продуцирана од самиот Принц. Преубава.

Кафе што дрма

12 тона заплениле ама три тона веќе отишле на пазарот. Субстандардно кафе, кое, за да изгледа попривлечно, го потемнувале со црн прашок добиен од - стари батерии. Размислувајте позитивно. Или негативно.

Што направија со зградава?

Најчесто се чекаат пари за да се продолжи со градењето, ама од време на време мајсторите просто имаат попаметна работа.

الميسترو نادر عباسي يجعل من الجمهور آلة موسيقية

Или што би се рекло на нашки: Маестро Надер Абаси ја прави публиката музички инструмент.

Оди фати му го крајот

Да се разбереме, во магија не веруваме, па ни во чуда, и тоа е многу проблем кога ќе ти се појави видео со ваква магија или чудо. Ама па барем цело жири им е извадено од памет, не сме само ние.

Кевин Харт удри на вежбање со другари

Видеата направени се исклучиво за Јутјуб каналот на Харт, и правени се со цела сила на серија со која би се гордеела која било водечка американска телевизија.

Бубамара за Милчо

Практично, ова е прв спот на двокомпонентниот, битолско-њујоршки лек за душа наречен Крсте Роџевски. Песната Ladybug ја има на неговиот албум "Bitter Almonds" но станува дел од саундтракот на последниот филм на Милчо Манчевски Bikini Moon (како што претходно беше направено со Shiny Things на Том Вејтс). Цут.

Смрт: реалност вс. Гугл вс. медиуми

Како луѓето умираат (бројки на американскиот Центар за контрола на болести), наспроти како ние мислиме дека умираат (што пребаруваме на Гугл), наспроти од што се умира според медиумите (што пишуваат Њујорк тајмс и Гардијан). Во основа, не така како што мислиме или како што пишуваат.

Дај да видиме што имаме да научиме од Амстердам за правење град за точаци

Амстердам имаше толку успех во префрлање на луѓето од четири на две тркала, што велосипедските патеки и премини речиси им се затнати, проблем што ги натера целото планирање околу патеките и проточноста да го кренат на сосема ново ниво.

ТЕД икс видео за сè што ве интересира за кафе

За добар дел од сè што е вон САД е крајно иритантно што Американците некако се наместија да бидат глобалниот авторитет за кафе, посебно што нивниот придонес кон светската кафе гастрономија е налик измиеното кафе од филтер. Без да исправаме историски неправди, дај да го чуеме Американецов што има да каже за кафе.

Забава за цело племе

Пар стари Абориџини ја откриваат бојата за коса и решаваат да се направат плавуши. Ништо нема да разберете, освен дека тоа се луѓе кои знаат да се зезаат и да се радуваат. Камо среќа ние да бевме такви.

Убавина во фавелата

„Кога ќе се спомне фавела, автоматски се помислува на опасност, насилство, хаос и бескорисност“, вели еден модел во краткиот филм за различните лица на модата во Рио. „Има и тоа, ама има и куп убави работи, ова е магичен свет“.

Од времето кога Британците отворено можеа да презираат други народи

Ако има нешто што авторов повеќе не го поднесува од Британија и нејзиното понашање низ свет, тогаш тоа е Белизе. Инаку, репортажата е британска, раситичка од запрепастувачки размери дури и за времето во кое е снимана (околу 1970-те), а тема е Белизе некаде во времето пред да се отараси од британска колонијална власт (што во реалност никогаш не се случува и Британија и ден денес има свои единици распоредени во земјата).

Зошто те боли глава?

Да не биде дека сме бесчувствителни на твоите лични проблеми, ама прашањето е општо. Одговорот исто така е општ - уште не сме скроз сигурни.