Добриот стил ретко зависи од тоа колку облека имаме, а многу повеќе од тоа колку паметно ја избираме. Жените што секогаш изгледаат средено обично не купуваат повеќе - купуваат поретко и со јасна идеја што навистина ќе носат.
Првото правило е гардеробата да одговара на животот што го живееме, а не на оној што го замислуваме. Наместо плакар полн со облека за ретки пригоди, треба да бираме парчиња што можат да се носат секој ден.
Подеднакво важно е да ги познаваме и боите што ни прилегаат. Не мора да се прави професионална анализа - доволно е да забележите кои нијанси ве прават посвежи и во кои секогаш си изгледате добро. Кога најголемиот дел од гардеробата е во неколку проверени бои, комбинирањето станува многу полесно.
Стилистите често советуваат секоја комбинација да има само еден впечатлив елемент - интересна кошула, впечатливо ланче или необични чевли. Така изгледот делува поелегантно отколку кога сè се натпреварува за внимание.
И материјалот е битен - природните ткаенини, како памукот, ленот или волната, подобро паѓаат на телото и оставаат впечаток на поголем квалитет. Затоа вреди прво да се допре ткаенината, а потоа да се погледне цената.
Удобноста е уште едно правило што не треба да се занемари. Ако панталоните стегаат, а чевлите болат по половина час, тоа се забележува и во држењето и во начинот на движење. Добриот стил никогаш не изгледа како да те мачи.
Потоа, детали - квалитетни чевли и добра чанта често оставаат посилен впечаток од десет просечни парчиња облека, па затоа многу модни експерти советуваат токму таму да се инвестира ако буџетот е ограничен.
Најважно од сè, жените со изграден стил знаат што им прилега. Кога купуваат, не се водат само од трендовите или попустите, туку си поставуваат едно едноставно прашање: „Дали ова навистина е како за мене?“
Токму тој филтер спречува плакарот да се полни со импулсивни купувања што никогаш не ги симнуваш од закачалка.
