Истражување изведено на колеџот Канисиус во Бафало, Њујорк, вели дека жените подобро спијат кога спијат со куче, отколку со член од нивниот вид. Дури и подобро отколку со мачка, извинете мачкари.
Го води професорката Кристи Л. Хофман, самопрогласена кучкарка (што значи мачкари, можете на раат да се буните дека е пристрасна). Испитани биле 962 жени низ САД, а од нив 55% пријавиле дека креветот го делат со барем едно куче, а 31% со барем една мачка. Од сите овие жени, 57 проценти истовремено спиеле и со партнерот.
Испитаничките пополниле прашалник за квалитетот на нивниот сон и колку безбедно се чувствувале поради присуството на миленикот. Тие со партнери добиле прашање и како другиот влијае на нивниот сон и чувството на сигурност навечер.
По анализа на податоците, Хофман и нејзиниот тим откриваат дека луѓето и мачките еднакво прекинувале сон кај жените, додека кучињата имале помала тенденција да ги будат.
Хофман вели дека причината може да е затоа што сопствениците на кучиња имаат подобри навики за спиење и построга дневна рутина од луѓето што немаат кучиња: главно - жените со кучиња си легнуваат и стануваат порано од жените со мачки.
„Тие што имаат кучиња мораат да се адаптираат на кучињата и нивните потреби за шетање наутро и ова помага да се држат до релативно строга рутина за будење,” вели таа. „А и кучињата главно спијат кога спијат и газдите, за разлика од мачките.”
Плус, како што вели Хофман, кучињата како партнери за спиење повеќе се адаптираат на распоредот на газдата отколку кога партнерот за спиење е уште еден човек. Исто така, нудат посилно чувство на сигурност - кучето ќе стане и ќе предупреди ако има натрапник или друг тип на итен случај. Мачката потешко ќе се нафати на вакви работи.”
Инаку, ако ве интересира зошто истражувањето се фокусира само на жени - веќе постои претходно истражување што покажува дека сите луѓе подобро спијат со кучиња. Хофман овој пат решила да прашува жени затоа што жените статистички полошо спијат од мажи.
А има и логистичка причина: иако истражувањето било отворено за сите, се пријавиле помалку мажи отколку жени, веројатно затоа што биле зафатени со влошување на квалитетниот сон на нивните партнерки.
