Луѓето знаат да се откажат после некој месец, како што сме виделе, сме осетиле на своја кожа, и како што кажува и Мелиса Коутс, професионален советник, психотерапевт и сопственик на Коутс Каунселинг во Џорџија. Ако се борите со анксиозност, или чувство на неадекватност, објаснува таа, притисокот за успех може да биде навистина штетен.
Затоа експертите препорачуваат да креирате одлуки кои се во корист на вашето ментално или емотивно здравје, наместо да си поставувате цели околу телесната тежина или финансиите. „Кога ќе вложиме енергија во заштита на нашето ментално здравје, правиме инвестиција која ќе се исплати во текот на целата година,” додава Џинџер Хотон, социјален работник и исто така советник, од Мичиген.
Финтата е да се креираат одлуки кои се „пофокусирани на холистичко подобрување и напредок,” вели Коутс, наведувајќи го ова наспроти фокусирање на одреден резултат. Замислете ја одлуката како намера, или како „свесен дневен, неделен или месечен избор кој ќе ви помогне да подобрите една страна од животот.”
Ако не знаете како да почнете, пробајте да размислите за претходната година, вели Хотон. Ова вклучува и размислување за она што ве мачело и она што поминало добро. Од таму, изберете на што би се фокусирале.
И запаметете дека ова е процес, и не мора да значи дека брзо се постигнува. „Дозволете си да не ви успее до крај првиот пат,” вели Коутс.
На крајот, најдобрите одлуки се тие што најмногу ви помогнале, но ако ви требаат идеи, еве има: практични и влијателни одлуки кои ги препорачуваат терапевти за да издржите оваа година.
Почесто викајте „не”
Не морате да кажете да на секоја покана за дружење, семеен настан или услуга. „Не е важен начин да си ги заштитиме границите и да се грижиме за себе,” вели Рејчел Томлинсон, психолог од Австралија. „Почнете да обрнувате повеќе внимание на тоа како се чувствувате на одредени барања или очекувања. Ако ве мачи тоа што се бара од вас, или ве лути, ве стресува или ви создава анксиозност, изгледа нема да ви биде пријатно и не сакате да го правите.”
Можете и да ги разгледате позитивните и негативните исходи во случај да кажете ‘не’. Ако некој негативно реагира на вашиот избор, не го сфаќајте тоа лично. Убавината во тоа да речеш 'не' на потенцијално непријатна ситуација значи дека можеш да кажеш 'да' на нешто што повеќе ти значи, како полнење батерии или време поминато со саканите.
Направете го спиењето приоритет
Квалитетниот сон е составен дел од доброто ментално и физичко здравје. Според истражувања, не само што сме нервозни, анксиозни и депресивни кога не спиеме добро, туку се мачиме и интелектуално да функционираме.
Добриот сон дава енергија и помага дури и да правите попаметни и поздрави одлуки околу храната. Спијте барем 7 часа навечер и работете на редовен распоред за легнување и станување, плус хигиена при спиење.
„Малите навики се многу ефикасни кога се работи за спиење, на пример да не гледате телевизија во кревет, да не работите во кревет и да не останете во кревет подолго од 20 минути кога не можете да заспиете,” вели Хотон.
Водете дневник наутро
Ако се будите преплавени од мисли за дневните обврски, не сте единствени. Сепак, да скокнеш веднаш на „бркање работа” значи да си го отежнеш контактот со сопствените чувства, нивото на енергија и потребата да се биде присутен.
Пред да истрчате низ врата или да почнете да одговарате мејлови во кревет, поминете 5-10 минути со дневник. Пишувајте за што сте благодарни, или позитивни афирмации. Или едноставно, запишувајте ги мислите и она што го чувствувате.
Допирот со себе како прво нешто што можете да го направите наутро, ќе ве спаси од негативните мисли и ќе ви помогне да бидете поприземјени и помалку анксиозни во текот на денот.
Сменете го начинот на кој ги коментирате работите
Јазикот има неверојатна моќ. „Она што си го кажуваме создава емоција и таа емоција после повлекува однесување,” вели Отом Колиер, клинички социјален работник и психотерапевт. Клучот за поинаква перспектива и паралелно развивање на поздрави навики е менување на внатрешниот дијалог.
Колиер препорачува да смени фразата „Треба” со зборовите „Би сакал/а да”. На пример, наместо „Треба да и се јавувам на мајка ми почесто” сменете го во „Би сакал/а да и се јавувам на мајка ми два пати неделно.”
Зборот „треба” создава очекувања за совршенство што е често нереалистично, а фразата „Би сакала/а да” го отстранува чувството дека не правиш доволно.
Посветете време на грижење за себе
Ова не е луксуз, ова е потреба. Посветувањето време на себе е од суштинска важност за ментална и емотивна благосостојба, поради што и Коутс препорачува оставање барем еден час во неделата за нешто што ве негува, без разлика дали е долга прошетка, час по грнчарство или кафе со пријател.
Имајте дневна намера
Тес Биргам, терапевт од Сан Франциско вели дека дневните намери креираат мапа за она што сакате да го постигнете во текот на денот, но што е поважно, го поставуваат тонот за начинот на кој сакате да се однесувате и да се чувствувате.
„Намерите секогаш треба да бидат врамени во позитивното, и така автоматски го менувате мајндсетот - од нешто страшно или нешто што недостасува во нешто што е надежно,” вели таа. Можете да одите на широко, или на нешто одредено. На пример: „Ќе бидам пријатен со сите што ќе ги сретнам денес,” или „Ќе вложам еден час во проектот што го одлагам.”
Учете нешто ново
„Многу помага за располжението и самодовербата и општо на погледот на животот, ако се фокусираме на учење и растење во текот на животот,” вели Хотон. Значи, што отсекогаш ве интересирало да научите, но сте биле или зафатени, или сте се плашеле да го направите приоритет? Фокусирајте се на тоа.
„Ова може да значи учење како се прави сирење, читање на дланка, јога или враќање на нешто што сте го сакале како деца,” објаснува Хотон. Поентата не е да станеш мајстор во нешто ново, туку да го стимулираш умот, да се предизвикуваш и да ја откриеш радоста на учењето само заради учење.
