Вести › Набрзинка

Тетовски автомобили со бугарски таблици на струја од јаглен

13 август 2022

Најновата тема за не-смеење: Во Влада.мк решиле да ѝ помогнат на една пропадната германска марка и милиони народни пари да се потрошат на божемна фабрика за електрични автомобили, којашто само за малку нема да се изгради.
Под Шар Планина ќе се произведувале електрични автомобили што никој не ги сака. Уште едно смешно автомобилско поглавје, од коешто на Македонија ќе ѝ преседне смеењето.
Несреќниот e.Go досега никој не го сакал, и нема ниту да го сака, затоа што е катастрофално лош автомобил, во поглед на изработката, во поглед на комфорот, во поглед на индустриското искуство. Најголемиот дел од историјата на автомобилот, помината е во навивање. Исто како Македонија што се надева дека еден ден ќе доживее пристојна власт, така и автомобилската сцена, барем еден микро-дел од неа, се надеваше и очекуваше дека e.Go еден ден ќе стане хит на пазарот.

извор

Масовни протести во Загреб против загадувањето во Лика

5 септември 2026

Десетици илјади луѓе демонстрираа на централниот плоштад во Загреб поради тоа што владата не почнала со расчистување на повеќе од 30.000 тони отпад кој ја загадува водата и природата во Лика.
Лани на локација близу Госпиќ беа откриени меѓу 34.000 и 37.000 тони отпад – од кој голем дел бил увезен од Италија во 2023 и 2024 година. Владата вети дека ќе ја исчисти локацијата, но еколошките групи тврдат дека е постигнат мал напредок.

Вјекослав Бушиќ од иницијативата „Госпиќ е наш дом“ побара од Владата во рок од 20 дена да претстави сеопфатен план за санација на загадените локации, со јасни и обврзувачки рокови. Организаторите на маршот бараат отстранување на 33.000 тони закопан отпад во рок од три месеци, итна забрана за увоз на отпад во Хрватска и одговорност за пропустите.
„Мора итно да ја утврдиме одговорноста на сите оние што молчеа и не презедоа ништо. Тука не смее да има компромис“, истакна Бушиќ.

извор

Видео-играта GTA VI е удар врз продуктивноста на САД

5 септември 2026

Американските бизнисмени стравуваат од пад на продуктивноста во втората половина на ноември, кога ќе биде објавена видео-играта Grand Theft Auto VI - првото ново продолжение од популарниот серијал по 13 години.
Со речиси 5 милиони нарачки ширум светот, излегувањето на играта на 19 ноември се очекува да повлече значителен дел од работната сила – феномен кој според Вол Стрит Журнал е рамен на неофицијален празник.
Слична ситуација имаше и во 2015 година, кога по пет години пауза беше објавено четвртото продолжение на играта Fallout. Производителот тогаш заедно со играта нудеше и лажни лекарски оправданија за отсуство од работа.
Неодамнешно истражување спроведено на над 2.000 гејмери покажа дека ноќните сесии на играње видеоигри во просек доведуваат до пад на продуктивноста од два часа следниот работен ден, со што се генерира загуба од 5,1 милијарда долари на ниво на САД.
Дури и Армијата на САД се вклучи во еуфоријата. Војници од 9-тиот инженерски баталјон на бригадата во Форт Стјуарт, добија известување дека секој војник што ќе го продолжи договорот за служба до 14 ноември ќе добие четири слободни дена за да може да се посвети на GTA VI.

извор