Вести › Набрзинка

Пребројување во ОН: Ние сме со Америка

24 февруари 2025

Премиерот Христијан Мицкоски потврди дека Македонија ја поддржува предлог-резолуцијата на САД за која Генералното собрание на Обединетите нации ќе гласа на третата годишнина од почетокот на руската агресија врз Украина.
Освен нас, уште 192 членки на ОН вечерва се соочени со незгодна задача да се определат за две спротивставени резолуции за Украина - првата предложена од Киев и поддржана од сите 27 членки на Европската Унија, а другата од Америка, со невообичаена поддршка од Русија.
Киев предложи резолуција со осуда на „општата воена инвазија од Руската Федерација врз Украина“ и потсетува на сите претходни резолуции со кои ОН побара од Русија „итно, целосно и безусловно да ги повлече сите свои воени сили од територијата на Украина во меѓународно признаените граници“.
САД ги притискаат сојузниците да ја поддржат нивната многу покуса резолуција. Во неа се изразува „жалење поради трагичното губење животи за време на руско-украинскиот конфликт“ и се бара „итен крај на конфликтот и понатамошни напори за траен мир помеѓу Украина и Русија“. По инсистирање од Русија, во последната реченица е додадена и фразата „да се адресираат и корените“ (на конфликтот).
За европската резолуција Македонија гласала воздржано.
Резолуциите изгласани од Генералното собрание на ОН не се обврзувачки, но се добар инструмент за проверка на дипломатските мускули преку надгласување.

извор

Питер Тил се мисли поголем милијардер од Папата

5 јули 2026

Милијардерот и технолошки магнат Питер Тил го обвини папата Лав XIV дека делува како „кинески комунистички агент“ застапувајќи се за регулирање на вештачката интелигенција во неговата серија предупредувања и предвидувања за иднината на вештачката интелигенција и западната цивилизација.
Ко-основачот на Пејпал и Палантир предупреди и на опасност од „социјалистички преврат“ во Демократската партија на САД.
Питер Тил беше еден од првите кои го поддржуваа Доналд Трамп а беше и ментор на кариерата на ЏејДи Венс.
Смета дека со тоа што бара меѓународна регулација на вештачката интелигенција, Папата се става во служба на кинеските интереси.
Во есеј од 2009 година, Тил напиша дека слободата и демократијата не се компатибилни а дека женското право на глас ја направило „капиталистичката демократија“ оксиморон. Ја финансираше кампањата на Халк Хоган против Гавкер (по која медиумот банкротираше) зашто го пишуваа дека е геј.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор