Вести › Набрзинка

Посебна боја за регистарските таблички за службените возила

19 септември 2024

Со измени во два закона ќе се воспостави регистар на сите државни патнички моторни возила кои ќе бидат обележани со регистарски таблици во посебна боја за полесно да бидат забележани од граѓаните.
Директорот на службата за општи и заеднички работи на Влада (СОЗР), Ивица Томовски, додава дека на овој начин ќе биде оневозможено нивното користење за приватни цели, со што дополнително ќе се зајакне транспарентноста и отчетноста на институциите на државата.
Супер. Зошто да не бидат со башка боја и службените општински возила на локалните чауши?

извор

Избришана е преписката на Урсула за вакцините од Фајзер

1 август 2025

Европската комисија индиректно потврдува дека се уништени текстуалните пораки што шефицата Урсула фон дер Лајен ги разменила со директорот на Фајзер, Алберт Бурла, во 2021 година, кога ЕУ преговараше да купи 1,8 милион дози вакцини против ковид-19 за цена 15 пати повисока од производната.
Наспроти обврската од законите за транспарентност, ЕУ тогаш ги одби барањата од новинарите да ги објави пораките, сметајќи дека „не се од интерес за јавноста“. Врховниот суд на ЕУ во мај пресуди дека „Комисијата не може без веродостојно објаснување да тврди дека не ги поседува документите“. Поради аферата Фајзергејт во Европскиот парламент се гласаше и за недоверба на претседателката на ЕК.
На новото барање од Њујорк тајмс дали се чуваат пораки меѓу Фон дер Лајен и Бурла, Комисијата на 28 јули потврдила дека таква комуникација постоела, но објаснува дека Фон дер Лајен лично била одговорна да процени дали текстуалните пораки се документи од интерес и дали имаат вредност за да се објавуваат и да се чуваат.
ЕК наведува дека сега не може да пронајде такви текстови и индиректно укажува дека не ги поседува. Фон дер Лајен неколку пати го сменила телефонот по комуникацијата со Бурла. Старите телефони биле форматирани и рециклирани - што значи дека сите информации во нив се уништени.

извор

Малку им е војна надвор

1 август 2025

Двајца украински пратеници од владејачката партија Слуга на народот на претседателот Володимир Зеленски се степаа во Врховната Рада за време на расправата за враќање на контроверзниот закон за антикорупциските органи.
Пратениците Владлен Некљудов и Генадиј Касаи се степаа токму на првата седница на Радата директно пренесувана на телевизија по три и пол години. Преносите беа забранети поради „безбедносни причини“ на 24 февруари 2022 година, кога Русија ја почна воената инвазија.
Наспроти очигледниот судир на ставови, законот што обезбедува независност на Националното биро за борба против корупцијата и на Специјализираното обвинителство за борба против корупцијата беше усвоен со 331 гласа за и ниту еден против.

извор