Оставката на Јанева е оставка за целиот тим
20 јули 2019
Вести › Набрзинка
Затворена DOGE, која на САД им заштеди 215 милијарди долари
8 јули 2026
- САД ја укинаа Канцеларијата за владина ефикасност (DOGE), која безмилосно ги кратеше непотребните федералните државни трошоци и бирократијата, но стивна со активностите откако Илон Маск се повлече од водечката функција лани во мај.
- Според податоците на DOGE, последен пат ажурирани на 1 јануари 2026 година, мерките спроведени од Канцеларијата заштедиле 215 милијарди долари од федералниот буџет, или 1.335 долари по даночен обврзник. Поништени биле повеќе од 13.000 договори, речиси 16.000 грантови и 264 владини заеми.
- Веднаш по основањето, Канцеларијата предизвика шокови низ администрацијата поради кратењето пари или укинувањето на агенции и проекти, вклучувајќи ја и USAID, за која Стејт департментот оцени дека не обезбедила резултати за американските граѓани, туку била користена за поддршка на „индустриски комплекс на невладини организации низ целиот свет“.
- „Иако Канцеларијата официјално се затвора, ќе продолжи мисијата за елиминирање на непотребните трошоци, измамите и злоупотребите. Доброто управување со парите на даночните обврзници и одговорната влада не се привремени иницијативи. Се надеваме дека овие принципи ќе траат долго во следните 250 години на Америка, објави DOGE во својата последна објава на X.
- Има уште за кратење. Трамп неодамна го назначи потпретседателот Џ.Д. Венс да предводи работна група за борба против измами, која досега првенствено се фокусираше на измами со програмата Медикејд на државно ниво. При крајот на мај Трамп изјави дека работната група веќе пронашла „милијарди и милијарди“ владини измами.
САД и Иран повторно се запукаа, овојпат сериозно
8 јули 2026
- По неколкунеделно затишје, американските сили ракетираа повеќе од 80 цели во Иран, на што Иранците одговорија со напади врз американски бази во Кувајт и во Бахреин.
- Централната команда на САД објави дека ракетите биле одговор на иранските напади врз три комерцијални бродови во Ормускиот проток. Биле погодени ирански противвоздушни центри, крајбрежни радари, антибродски системи и над 60 брзи чамци на Револуционерната гарда.
- САД претходно објавија дека повторно воведуваат блокада за ирански бродови и дека ја укинуваат привремената лиценца за извоз на иранска нафта.
- Иран ги обвини САД за прекршување на примирјето и возврати со ракетни напади врз Кувајт, каде што има бази со американски трупи, и Бахреин, каде што е Командата на Петтата флота на САД. „Ерата на провокации и уцени заврши. Нема да потклекнеме“, изјави спикерот на парламентот, Мохамед Багер Галибаф.
- Престрелката потврдува дека САД и Иран се поблизу до војна отколку до преговори за конечен мировен договор. Иран инсистира на правото на целосна контрола на сообраќајот низ Ормускиот проток, а Америка настојува да обезбеди слободен премин на бродови. Временската рамка од 60 дена за преговори за конечен договор завршува во август, а двете страни практично не ги ни почнале преговорите.
