Вести › Набрзинка

Нов електронски систем против операции преку ред

4 февруари 2026

Министерството за здравство отвори нов систем за евиденција на операциите во сите јавни здравствени установи во земјава, со кој очекува да се воведе ред и да се намали бројот на операции преку врски.
„Листата на закажани операции од денес е јавно достапна и пациентите ќе имаат увид колку луѓе за операција има пред нив во секоја болница и кај секој хирург“, изјави министерот Азир Алиу. Порталот може да се отвори тука.
Лекарите досега имаа обврска операциите да ги евидентираат во системот Мој термин со издавање упат за операција, но анализата на состојбата во 2025 година покажала дека во системот биле внесени 34.862 операции помалку отколку што направиле болниците.
Упатите не биле издавани веднаш при утврдување на потребата за операција туку пред самата интервенција, некои болници и лекари користеле друг тип на упат, лекари воделе листи во хартиена форма и листите на чекање не биле редовно прочистувани. Тоа создава неточна перцепција за времето на чекање на пациентите.
Алиу очекува со новиот систем значително да се намали бројот на операции со врски. „Со ова ќе може да се намали, не сум сигурен дека ќе може да се отстрани целосно, практиката ‘знам некого па ќе одам пред листата на чекање’... Ова ни беше многу битно и мора да почнеме од некаде“, изјави министерот Алиу.

извор

Делхи се пржи на 64 степени

15 јуни 2026

Официјалните мерни инструменти покажуваат дека температурата во главниот град на Индија е 43,5 целзиусови степени.
Меѓутоа, термалнитe камери поставени од Гринпис покажуваат дека на одредени локации во градот, вистинската температура која ја трпат луѓето оди и до 64 степени. Тоа го прават улиците, асфалтот, бетонот, сообраќајот....
Термалните камери под сенка мерат „угодни“ 40-тина степени но моторџии кои под директно сонце чекаат на семафор или да мрдне колоната се на над 60 степени.
Бетонски клупи за одмор имале температура од речиси 57 целзиусови степени.

извор

ЕУ е спремна да прими земја која фактички не знае до каде ѝ се границите

15 јуни 2026

Европската Унија е подготвена од јули да почне преговори за сите области од пристапниот процес со Украина и со Молдавија, изјави еврокомесарката за проширување Марта Кос.
Оценила дека дека процесот на проширување значително се забрзал и дека во последните месеци е постигнат поголем напредок отколку во претходните 15 години.
Во Луксембург ќе се одржи и меѓувладина конференција со Црна Гора, на која земјата треба да затвори уште две преговарачки поглавја – слободно движење на работници и заштита на потрошувачите и здравјето.
Во меѓувреме, Унијата работела на нов пакет санкции против Русија.
Освен што е во војна, Украина лошо стои со корупцијата а Молдавија е полошо рангирана и од Македонија според последниот Corruption Perceptions Index на Транспаренси.

извор