Вести › Набрзинка

Израел одбил план за итно ослободување на заложниците на Хамас

30 септември 2026

Катарскиот премиер, шеикот Ал Тани, тврди дека израелските власти одбиле да разгледаат план според кој Хамас итно би ги ослободил израелските цивили грабнати при терористичкиот напад на 7 октомври.
Катарски претставници веднаш по нападот имале „тешка средба“ со лидери на Хамас. Издејствувале план Хамас да ги ослободи сите цивилни заложници, во замена за привремено примирје. Кога планот бил претставен до израелските власти, тие одбиле да го разгледаат и одговориле дека Хамас треба безусловно да ги ослободи сите заложници, раскажа катарскиот шеик во разговор со Пирс Морган.

Терористите на Хамас на 7 октомври 2023 година грабнаа 251 заложник. Само 166 се вратија живи. Повеќето беа ослободени преку договори со Хамас, а само осуммина со директна акција на израелските сили. Другите 85 починале, биле убиени или загинале во воените дејства. Израелска единица по грешка уби тројца Израелци кои избегале од заложништво.
На прашањето од Пирс Морган дали го смета Бенјамин Нетанјаху за воен злосторник, Ал Тани одговори: „Се разбира дека во Газа се извршени воени злосторства. Секој што е одговорен за тоа е воен злосторник“.
Тој го осуди и терористичкиот напад на Хамас како масакр за кој треба да се казнат виновниците.

20 октомври 2026

Управата за финансиска полиција поднесе кривична пријава против поранешниот генерален директор на АД „Пошта на Македонија“ поради сомнение за злоупотреба на службената положба и овластување.
Се наведува дека тој не постапил согласно одлуките на Управниот одбор за исплата на обврски кон две правни лица. И покрај тоа што му биле доставени потребните документи за исплата, пријавениот не ја потпишал спогодбата за исплата на долгот, не ги потврдил фактурите и не ги потпишал налозите за плаќање.
Со тоа оставил простор овие да поведат судски постапки кои ги добиле па штетата за Пошти на основ на исплата на затезни камати е речиси 11 милиони денари.

20 октомври 2026

Владата на САД би можела да блокира ботови со ВИ ако утврди закана дека може да предизвикаат смрт на повеќе од 50 луѓе или штета повисока од 1 милијарда долари.
Ова е предлогот на Антропик во нацрт-закон за „безбедност“ на вештачката интелигенција, поднесен до Конгресот на САД.
Сè што е подолу од овие граници би се толерирало како „разумна политика“.
Проценетиот ризик од моделот со ВИ би морал да произлегува од дизајнирање или создавање на биолошко оружје, кибернетски напад или бегање на агент со ВИ од контрола на лабораторијата во која се развива.
Ризикот би го проценувале „независни евалуатори“, регистрирани во Министерството за трговија, при што е оставена можноста за нивните услуги да плаќа лабораторијата во која вршат увид.