- IBM изгуби помеѓу 67 и 70 милијарди долари пазарна капитализација во еден ден, во историски најлош пад на акциите во изминатите 58 години.
- Акциите на IBM вчера паднаа за 25% откако технолошкиот гигант објави разочарувачки раст на приходи од само 1% во вториот квартал.
- „Во последните неколку недели клиентите ги префрлаа своите капитални трошоци кон сервери, складирање и купување меморија за да обезбедат инфраструктура пред очекуваното зголемување на цените... Не се адаптиравме и не се движевме доволно брзо“, порача извршниот директор Арвинд Кришна во писмо до инвеститорите.
- Бизнисите даваат приоритет и на вложувања за безбедност, бидејќи напредните алатки со ВИ овозможуваат пософистицирани кибернетски напади. За ова сведочи порастот на акциите на CrowdStrike за 12%, а на Okta и Netskope за по 11%.
- На ова поле IBM ја промовираше Lightwell - иницијатива од 5 милијарди долари за отстранување на ранливостите во софтверот со отворен код, со поддршка од Bank of America, JPMorganChase и Goldman Sachs и други големи банки.
- Претставничкиот дом на САД усвои закон за трајно воведување на летното сметање на времето низ целата земја.
- „Промената на стрелките на часовникот двапати годишно е реликт од минатото кој повеќе не го одразува начинот на кој Американците живеат, работат и водат бизнис во 21 век“, објасни републиканскиот конгресмен Гас Билиракис, ко-спонзор на Законот за заштита на сончева светлина.
- Демократските конгресмени овојпат ја поддржаа мерката, за разлика од 2022 година, кога го отфрлија со аргумент дека таа влијае врз Американците што одат на работа рано во текот на зимските месеци.
- Експертите за спиење се залагаа за трајно воведување на стандардното време, а не на летното, бидејќи според нив „тоа најдобро би се усогласило со циркадијалните ритми на луѓето и би го подобрило нивното здравје“.
- Белата куќа отворено го поддржа законот, опишувајќи го како „мерка заснована на здрав разум“.
- Основниот Кривичен суд Скопје го ослободи од обвинение поранешниот премиер Никола Груевски за случајот „Талир 2“, за пречекорување на службени овластувања и противправно финансирање на изградбата на партиското седиште на ВМРО-ДПМНЕ.
- Судијката Даниела Алексовска објасни дека ослободителната пресуда е директна последица на законските измени од 2023 година, а не на различна оценка на доказите.
- Според Судот, иако претходно истите докази биле доволни за да се утврди злоупотреба на службената положба, по законските измени тие не биле доволни за да се докаже кривичното дело пречекорување на службените овластувања.
- Трошоците за судската постапка паѓаат на Буџетот на државата. Судот го одби и предлогот на Обвинителството за конфискација на седиштето на ВМРО-ДПМНЕ.
- Предметот „Талир 2“ повторно беше отворен по одлуката на Апелацискиот суд од јануари 2024 година, кога првостепената пресуда беше укината поради измените на Кривичниот законик. Во првото судење во 2022 година Груевски беше неправосилно осуден на 6 години затвор, но постапката беше вратена на повторно судење.
