Вести › Набрзинка

Германија конечно дозволи двојно државјанство

20 јануари 2024

Германскиот парламент го усвои законот кој стапува на сила во април а со кој се либерализираат условите за државјанство.
Дражавата ќе дозволи дупли пасоши (до сега нашите и другите мораа да се откажат од македонското за да добијат германско), а наместо осум, ќе бидат доволни и пет години легален престој (во некои случаи и само три години).
Нема да мора да се полага ни јазичен тест, доволно ќе биде разбирање на германски.
Меѓу 12 милиони ауслендери во Германија, 5,3 милиони се таму преку десет години. Често не се решавале за германски пасош за да не станат странци во својата татковина.
Досега, право на двоен пасош им се дозволуваше само на луѓе од земји како Грција, Иран или Мароко, кои не дозволуваат откажување од државјанство.

извор

Урсула виновна за сите точки од „Фајзергејт“

14 мај 2025

Европската комисија постапила незаконски кога одбила да ги објави текстуалните пораки што претседателката Урсула фон дер Лејен ги разменувала со директорот на „Фајзер“, Алекс Бурла во врска со купувањето вакцини за ковид, пресуди Врховниот суд на ЕУ.
„Комисијата не може да тврди дека не ги поседува документите што ги побарале новинарите без да даде веродостојни објаснувања, кои на јавноста ќе ѝ овозможат да разбере зошто тие документи не може да се пронајдат“, наведува Судот.
Њујорк тајмс, кој ја покрена тужбата, поднел релевантни и доследни докази што укажуваат на постоење на текстуални пораки помеѓу претседателката на Комисијата и генералниот директор на „Фајзер“ во врска со набавката на вакцини. Весникот дознал за пораките во 2021 година при интервју со Бурла. Кога ѝ биле побарани документите, Европската комисија одговорила дека „не е во состојба да ги обезбеди“.
Пресудата е сериозен политички удар за Урсула фон дер Лејен, која и порано беше критикувана дека ја задушува транспарентноста во извршното тело на ЕУ.
„Ова е голем поен за транспарентноста. Луѓето сакаат и имаат право да знаат како се донесуваат одлуки. Тоа е суштинско во демократијата. Дури и кога се прави и со СМС-порака“, изјави холандската европратеничка Ракеле Гарсија Хермида ван дер Вале.

извор

Земјотрес од 6,0 степени кај Крит

14 мај 2025

Земјотрес со интензитет од 6,0 Рихтери изутрината го погоди регионот на грчкиот остров Крит, но нема информации за повредени лица или сериозна штета.
Жариштето било на длабочина од 64,4 километри, а епицентарот 19 километри јужно од малиот остров Касос.
Предупредувањето од итните служби за можно цунами било превентивно. Не се забележани големи бранови.
Потресот бил почувствуван во Турција, до Израел на исток и до Египет на југ.
Ова е изолиран инцидент. Нема значителна секвенца ниту афтершокови, изјави сеизмологот Ефтимис Лекас.
Тој тврди дека земјотресот кај Крит не е поврзан со сеизмичката активност кај Санторини: „Геотектонскиот контекст е сосема поинаков“.

извор