- Бразил и Кина постигнаа договор меѓусебе да тргуваат во своите валути. Тоа значи дека директно ќе менуваат јуани во реали и обратно, без посредување на американскиот долар.
- Кина е најголемиот трговски партнер на Бразил и двете држави лани имаа рекордна размена од 200 милијарди долари.
- Пекинг има слични договори со Русија, Пакистан и неколку други земји.
- Доналд Трамп вели дека со извршна наредба ќе го укине гласањето по пошта на изборите за конгресмени и сенатори идната година. Му пречи и гласањето со машини.
- Ќе водам иницијатива за да се ослободиме од гласови испратени по пошта. Кога сме тука, и од непрецизните, скапи и контроверзни гласачки машини, објави Трамп на својата социјална мрежа.
- Идејата наводно ја добил на самитот со рускиот претседател во петокот. „Владимир Путин, умен човек, кажа дека не може да има чесни избори со гласање по пошта. И тој рече дека ниту една земја во светот денес не ги користи“, забележа Трамп. Всушност по пошта може да се гласа во десетици земји.
- Федерални судии во март ја блокираа наредбата од Трамп за поднесување доказ за американско државјанство, како услов за гласање, и да не се бројат валидни гласови испратени по пошта што ќе стасаат по изборниот ден.
- Хамас го прифатил предлогот за 60-дневен прекин на огнот и ослободување на една половина од заложниците што се уште ги држи во Газа, објавија египетски посредници.
- Основа за египетско-катарскиот предлог била платформата што ја претставил американскиот специјален претставник Стив Виткоф, која Израел веќе го прифати.
- Хамас во две групи би предал една половина од заложниците, во размена за палестински затвореници. Во овој период би почнале индиректни преговори за траен прекин на огнот.
- Израелскиот премиер Бенјамин Нетанјаху минатата недела објави дека би прифатил прекин на огнот само ако Хамас ги ослободи сите преостанати заложници.
- Израел во меѓувреме почна подготовка за окупацијата на градот Газа. Операцијата би требало да почне по неколку недели, но тенкови и блиндирани булдожери напредувале во квартот Сабра.
