„Што да прави јадниот народ?“ му поставуваат на Џони едно од оние евергрин прашања за јадниот народ. „Што бре јаден народ - вика тој- секој има своја глава, нека мисли, нека се организира. Кој ќе му ги решава проблемите, Господ?” - Ама ќе му залепат етикета... - Па што! - не попушта Џони, лут, прецизен, срча. „Најважно е човек сам со себе да е слободен“, порачува најголемиот бунџија некогаш роден во Скопје.

Љубчо Нешков од БГНЕС поштено ја опишува нефункционалноста на македонскиот систем, партизираноста, некомпетентноста... Нафрлува и загрижувачки податок: нашиве дозволиле бугарските авиони за транспорт на пациенти да дојдат дури после 18 часа (со што се изгубило драгоцено време)! Само што, не знаеш дали Бугарите почесто користат чубрица или Тито. Кога почнале проблемите на Македонците? Кога Тито им ја направил државата.

Кога од страна се гледа гневот на кочанчани, ни доаѓа да ги потсетиме дека цел град со години знаел за тој ќумез, каков е, што работи, до кога работи и кој влегува внатре. Ама па, после ќе ни текне, што ако знаеле, да не можеле нешто да сторат кога ќе се вплеткаат во корумпираниот институционален пинг-пинг, ингеренции, мингеренции. Еве ние знаеме како е во наше маало и не дека сме ќутеле.

Агенцијата Ројтерс објави вознемирувачка снимка од дрон, за тоа како кочанските гробишта се подготвуваат да ги примат сите кои настрадаа во кошмарот во дискотеката Пулс. Телата на жртвите во моментов сè уште се на обдукција во Скопје.... Ужасна реалност, ужасно видео.

Искуството покажало дека лекување на еден пациент со изгореници во европска држава би го чинело Фондот минимум 150 - 250 илјади евра, а бидејќи сме социјална држава, секој пациент за чие лекување нема услови во македонското здравство има право да се лекува во друга држава на товар на Фондот. Се поставува прашањето дали државата ќе ја чини помалку да формира современ Центар за изгореници или да испраќа пациенти на повеќемесечно лекување надвор?

@kengurMKD: Не апсат тај шо треба, апсат го Столе Бојата. Човек шо извади 100 души! И стое на вратата за дневница. Не другари, не кримоси, не вака! Еве ви го списоко да ви биде полесно од дека да почнете!

„На ваков тажен ден, кога цела земја плаче по 60 загинати деца, некому текнало да организира дрифт настан со над 300 возила, а пријавиле „снимање спот". При тоа, причинети десетина судари и штети на паркингот на СЦ „Борис Трајковски". Ова ниту сум го дозволил, ниту некогаш ќе го дозволам!“, напиша директорот на СЦ Борис Трајковски, Даниел Апостолоски.