Не е за провинцијалци, тоа е чисто за да биде попровокативен насловот. Станува збор за пилешко од Провaнса, регион во Франција. Овој регион етимолошки мора да има нешто заедничко со зборот ‘провинција’, ама намерно не проверувам за да остане мала конспираси-мистерија. Веројатно ви е познат Прованса миксот од зачини: рузмарин, мајчина душичка, оригано и босилек.
Епа провинцијалци, староседелци, дошљаци, гастербајтери, домородци, заролувајте ракави како Елвис Присли у пикот на кариерата:
Кило пилешки гради. БАРЕМ СЕ ГРАДИ!!! Секое парче го сецкаме на косо. Откако направиме пилешки раскол на два дела, секој од деловите треба да го протриеме од даската за сецкање со нашата шепа, како да е топче тесто. Целта е да оформиме пилешки топки. Зачинуваме со сол, црн пипиер и сушена мајчина душичка.
Тава врела како вилсмитовски шамар. Топиме 50тина грама путер и капнуваме малку масло за да спречи потенцијално поцрнување на путерот. Зејтинот е крема за сунчање у светот на путерите. Пилешките гради ги бланшираме по 4-5 минути по страна. Секси карамелизација. Бараме нијанса ко тен на пост-солариумска водителка. Ги вадиме и тргаме во чинија.
Во истата тава ставаме 3 чешниња тенко сецкан ЛУКас, 2-3 сардели, 100 мл. бело, око мене све је бело вино, 100 мл. доматно пире, обезсемкани црни маслинки, ситно сецкан магдонос и 300 мл. пилешки бујон. И уште 50 грама путер. Ја заборавив да ставам додека праев, па го додадов откако го вратив назад пилешкото.
Иначе околу сарделите: мали конзервирани рипки кои даваат феноменален умами буст на храната. Овде е опционално, но нема да се покаете доколку ги додадете во сосот. Да му веруваш на дедо! На среден огин го крчкаме сосот 5 минути. Во оваа неодолива врела лава го враќаме месото. Дајте му уште десетина минути време да се запознае со сосот. Сосот е Француз, мора малце пострпливо, Французите се углавном тешки на прва. Месото го ротираме на секои 2 минути за да остане сочно.
Готово! Чекаме малку да олади за сосот да се згусти како последната недела пред плата и сетне сервираме. А може и да не сервираме. Вистинските гурмани и чорбаџии/џики цепат директно од тава.
Овој рецепт не се препорачува со ништо безалкохолно. Зошто? Затоа што е греота!
Кирил Стоименов – антибезалкохолист
