Значи вака: никој ме нема прашано дали сакам и не сакам да се родам на овој карусел наречена планета Земја. На некој му било ќејф и еве ме - едно 90 и кусур кила погрешни животни одлуки отелотворени у небитие, помеѓу вистинските хедонисти не-толку-познат како Кирил Стоименов. Едноставен лик, љубител на поезија, фан на Ипче Ахмeдовски и вечен конзуматор на трици на своја сметка. Оперира низ животот со јасно мотo: Ако храната не ми предизвика мала егзистенцијална криза од среќа после првиот залак, нешто не е у ред со истата.
Денешниот рецепт ги решава сите круцијални дилеми:
Да, животот е тежок.
Дa, сметките се високи.
Да, Македонија 30 години ја водат накапани авокада.
И?
И после оваа кременадла, одеднаш светот личи на подобро и поподносливо место. Ова парче свинско месо ќе го дотераме во крцкаво панко одело. Да пуцкета како стар винил. „Земи или остави“ варијанта. Ако земеш, ќе ти биде најјако. Ако не - оди јади брокула и плачи.
Го декорираме со печените пиперки чиј мирис е Македонија во три димензии: дим, топлина и слатка лутина.
Крунисуваме со домашен кајмак. Тука ќе се јават научници дека ова не е вистински кајмак и ќе бидат у право. Но во однос на времето за припрема, оваа е повеќе од одлична имитација.
Ако некогаш се прашувате што е смислата на животот, еве ја: Парче месо, крцкаво, со пиперки, кајмак и пијачка по избор. Сè друго е LinkedIn мудросерија и заостанати долгови.
Состојки:
2 парчиња свински кременадли со коска
100 г панко презла
2 јајца
200 г свежи зелени пиперки (мали, зелени од сортата Падрон, или било какви други)
2 лажици брашно
Сол Бибер Масло за пржење
80 г Фета
50 г Крем-сир
60 г Крем фреш
100 г Путер
Подготовка:
Стартуваме со кајмакот: Во длабок сад ги инсталираме сите компоненти и со ладно оружје - вилушка, пасираме додека да се соединат и да станат една компактна кремаста структура. Саат време у фрижидер.
Припрема на кременадлите: Извадете ги кременадлите од фрижидер и оставете ги да се одморат на собна температура. Потоа, малку исчукајте ги, но внимавајте да не се растурат. Потоа, посолете ги и ставете малку бибер од двете страни.
Панираме: Во еден сад ставете брашно, а во другите два садови изматете ги јајцата и ставете ја панко презлата. Најпрво, кременадлите ставете ги во брашното, потоа во јајцето, и на крај, добро премачкајте ги со панко презлата.
Пиперките: Додека го подготвувате месото, истурете малку маслиново масло во тава и загрејте го на средна температура. Ставете ги пиперките да се пржат, повремено вртејќи ги, сѐ додека не добијат темна боја и не омекнат.
Пржење: Во голема тава ставете масло. Кога маслото ќе се загрее на среден оган, внимателно ставете ги кременадлите. Пржете ги околу 5–7 минути од секоја страна или додека не добијат убава, златнокафеава боја.
Сервирање: Откако ќе бидат готови, извадете ги кременадлите и оставете ги малку да се одморат. Потоа, ставете ги на чинија, додајте ги печените пиперки, и одозгора, на кременадлата, ставете го домашниот кајмак. Југословенски, со лажица за правење топки сладолед. И делкајте до зла бога!
Добар апетит!
Кирил Стоименов - модерен Фред Флинстоун
