Да ти каже некој да опишеш малер на колото, прво треба да ти текне на украинскиот стопер од ПСЖ Илија Забарњи. Има среќа што неговите на крај славеа рекордна победа од 2:7 на гостувања во Лига на шампиони, против Баер Леверкузен. Илија скриви два пенали од кои едниот го промаши домашниот бек Грималдо а во 37-ма минута доби и црвен картон. По негова среќа црвен во 33' минута доби и противничкиот фудбалер Андрик па се играше 10 на 10 до крајот .

20-годишниот корпулентен шпиц на Интер и најголема надеж на италијанскиот фудбал, Франческо Пио Еспозито ја користи секоја шанса што ја добива од тренерот Кристијан Киву. Има 2 гола и 1 асистенција за нераѕурите. Синоќа Интер победи убедливо 0-4 против Унион Ројал. Стрелци Дамфрис, Лаутаро Мартинез, Чаланоглу од пенал и Пио Еспозито. А гледајте и што промаши младиот центарфор сам пред гол.

Алжирецот Рами Бенсебаини сака да ви покаже еден пример за чист, точен и презицен клизач на дуелот Борусија - Копенхаген 2:4. Перфектно одиграно.

Њукасл ја совлада Бенфика на Мурињо со 3:0 и тоа беше една од најнеефикасните победи во синоќешната луда голгетерска ноќ од ЛШ. Асистираше голманот на Њукасл кој со рака го префрли пола терен и нешто повеќе, а стрелаше Харви Барнс. Ник Поуп стана втор англиски голман во историјата на ЛШ, кој успеал да запише асистенција.

Наполи се соочи со дебакл во Лига на шампиони. Загуби дури 6:2 од ПСВ, а Елиф доби шанса во 85 минута на местото на Де Брујн. Го издвојуваме голчиштето на Денис Ман. Ама ја дувна.

Дожд од голови во 3. коло од ЛШ. Во Барселона паднаа 7 гола, во Холандија 8, а во Леверкузен 9, каде ПСЖ го оствари највисокиот триумф против германски тим на гости во историјата. Вкупно 43 гола и 5 црвени картони на 9 натпревари или скоро 5 во просек по натпревар. Атлетико лошо помина на Емирати.

Репрезентативецот на Зелено’ртските Острови, Жоао Кореија е пациент број 1 во 3. коло од ЛШ. Патуваше 15 часа до Казахстан за 4 минути фудбал. Пафос играше речиси цел натпревар со играч помалку на гостувањето против Каират Алмати, поради неговиот груб и непромислен глупав фаул. Мечот заврши 0:0.

Фармацевтите се непосакуван гостин во Бундеслигата. Зошто? Затоа што не може никој да ги победи од 27 мај 2023-та. Само еден играч од тој ден може да се пофали дека е сè уште во тимот со кој го живее рекордот. Тоа е Роберт Андрих. Играчот од средниот ред ја држи рекордната гостинска низа од 38 меча без пораз, со што ги надмина Данте и Филип Лам.

Фудбалерите на Милан играат како препородени со старо-новиот тренер Масимилијано Алегри и по триумфот над Фиорентина 2-1 после пресврт, се први на табела. Главен јунак на победата беше Рафаел Леао кој при прослава на вториот гол тргна во еуфорија да го соблекува дресот. Ама стоперот Матео Габија го спречи да добие жолт картон.

Кин имаше чиста и јасна намера, а тоа е да се обиде да му ја земе. Ама голманот на Милан одигра еден на еден за воздишки на Сан Сиро.

Додека фудбалерите на Реал Мадрид водат борби на теренот, управата на најтрофејниот клуб на светот и градската управа се во „војна“ со граѓаните од непосредно опкружување на стадионот „Сантијаго Бернабеу“

Околу 2.000 навивачи на Манчестер Јунајтед беа на гостување кај најголемиот ривал Ливерпул на „Енфилд Роуд“ и ја прославија големата победа, ретка низ годиниве на гости 1-2. Пред натпреварот кога „се искрцале“ во Ливерпул, биле на само 5 метри од домашните навивачи. Некој пивнат, некој под гас, ама сè останува на дофрлања и провокации. Знаат што ги чека ако направат скаламуција.

Во скандинавскиот фудбал се случи нестварна и до сега невидена бајка. Рибарското село Мјалби кое пред неколку години беше пред банкрот, слави шампионска титула. Ги води 59-годишен директор на училиште, а скаутот им е поштар. Едно време ни теретана немале, а јаделе заедно само еднаш неделно.

Го видовме најјакиот гол на годината кој падна во Русија, потоа автоголот во Швајцарија кој не се повторува. И сега пазете го ова. Сте виделе ли ваква дефанзивна акробација на сама гол линија и тоа од страна на напаѓач? Елвир Кољиќ од Рапид Букурешт на средбата со Динамо.

Дваесет и седум годишниот бек на Хетафе Хуан Иглесијас имаше неколку дуели и расправии со Бразилецот Винисиус а во еден момент му рекол: „Ете затоа никој не те сака никаде“. И во право е, поради арогантниот и дрзок однос Бразилецот не е омилен, туку омразен лик по шпанските стадиони. А дека игра фудбал игра маестрално.

Давид Гроф од Ференцварош се избламира за сите пари и направи тензија без потреба, која ја плати со црвен картон. Во обид побрзо да изведе, го бутна на земја малиот што собира топки и тоа силно. Згора на сè, неговиот тим ги имаше извршено сите измени, па мораше еден од играчите на терен да го замени на гол.

Имавме викенд на чудесии од голови. Се разбира никој може да му го земе приматот на Дмитриј Воробјов од Локомотив. Но затоа, Пиус Дорн од Луцерн е врвот во друга категорија, а тоа се автоголовите. Мајсториште.

Во големото дерби на грчкиот фудбал солунски ПАОК на гости го совлада АЕК со 0-2 со голови во 45-та и 48-ма минута. Оној вториот на Јанис Константелиас беше по грешка на домашниот стопер Харолд Мукуди (доби и црвен во 86-та минута) но и по маестрален потег на фудбалерот на ПАОК без топка.

Дербито меѓу Локомотив Москва и ЦСКА од викендов донесе гол за неверување и нејасен за објаснување. Мечот заврши 3:0 за домаќините, а автор на ударов кој се коси со физиката е Дмитриј Воробјов. ФИФА затворајте го изборот за гол на годината. Толку е.

Реал Мадрид синоќа едвај го скрши тврдиот отпор на Хетафе чиј харизматичен тренер Хозе Бордалас е познат како стручњак чии екипи играат груб и одбранбен фудбал. Килијан Мбапе постигна прекрасен гол во 80-та минута за победа а триумфот многу им го олесна и глупиот потег на Алан Ниом кој само што влезе од клупа за резерви доби директен црвен картон за само 30 секунди! Само седум минути после него Хетафе доби уште еден црвен картон и го заврши мечот со 9 играчи.

Мбапе не запира. Стигна до гол број 15 сезонава на 11 меча на сите натпреварувања. Овој пат вреден 3 бода на гостувањето против Хетафе. Го даде во 80-та минута, а јунак во 96-та минута беше Тибо Куртоа. Погледнете го како му влезе еден на еден.

Комо го тресна Јуве 2:0, ги победи и Фиорентина и Лацио, а не загуби од Аталанта. Само еден пораз имаат во првите 7 кола. Фабрегас изгледа знае што прави, а умее и да ги мотивира со неколку реченици после натпревар.

Најисмејуваниот фудбалер во Премиер лигата стана експерт за решавање натпревари во финишот. Ливерпул го кутна во 84-та минута. Во соблекувална следуваа честитки. Чујте го Бруно на крај на клипот. Од кај го извади гласов? :)