Нова изложба во лондонската галерија Тејт Модерн, која се отвора утре, 25.06., ја истражува приказната за тоа како Фрида Кало станала една од највлијателните личности во историјата на уметноста, но и како нејзиниот лик бил претворен во производ што се продава низ целиот свет. Кураторката Беа Гарсија-Веласко вели дека ова е првата изложба што критички и историски го анализира таканаречениот „феномен Фрида“.
На изложбата се претставени повеќе од 200 комерцијални предмети инспирирани од неа – од кукли и сувенири до предмети во кои е прикажана како светица или духовен симбол. Според кураторите, важно е да се покаже дека огромната популарност на Фрида има две страни: од една, прекумерната комерцијализација може да го засени нејзиното уметничко творештво, но од друга, токму таа широка присутност им овозможила на луѓето од различни култури и генерации да ја прифатат како своја инспирација.
Покрај комерцијалните предмети, изложбата содржи повеќе од 30 нејзини најпознати дела, како и нејзина облека, накит, фотографии и лични предмети. Изложени се и над 200 дела од нејзини современици и од уметници кои биле инспирирани од нејзиното наследство.
Фрида Кало за време на својот живот создала околу 200 дела, од кои 55 се автопортрети. Поради релативно малиот број дела што ги оставила зад себе, нејзините слики денес се исклучително вредни. Минатата година нејзиниот автопортрет „Сонот (Креветот)“ беше продаден за 41,8 милиони фунти, што го направи најскапото дело од жена-уметник продадено на аукција.
Според кураторката, интересот за нејзината уметност не се должи само на нејзината реткост, туку и на темите што ги обработувала. Фрида отворено зборувала за физичката болка, инвалидитетот, женското тело, репродуктивните проблеми и личното страдање – теми што долго време биле сметани за табу.
Интересно е што денес Фрида Кало е многу попозната отколку што била за време на својот живот. По нејзината смрт во 1954 година, нејзиното творештво долго останало во сенка на нејзиниот сопруг, прочуениот мексикански муралист Диего Ривера. Нејзиното повторно откривање започнало во 1960-тите и 1970-тите години, кога движењето на Чиканосите во САД – борба на Мексиканско-Американците за граѓански права и културен идентитет – ја прифатило како симбол на отпор, гордост и културна самосвест. Токму ова движење одиграло клучна улога во враќањето на Фрида Кало во центарот на светската култура.
Денес нејзините автопортрети продолжуваат да ги привлекуваат посетителите бидејќи создаваат чувство на интимност и искреност. Нејзиниот живот исполнет со болка, храброст и творечка енергија, како и внимателно изградената јавна личност, ја претворија во симбол што допира до луѓе од различни генерации и средини.
Изложбата „Фрида: Создавањето на една икона“ ќе биде отворена во Тејт Модерн во Лондон од 25 јуни до 3 јануари 2027.
