Главната улога во биографскиот филм за Берлускони ќе ја игра Тони Сервијо, истиот оној кој го играше декадентниот писател во „Големата убавина“. Работниот наслов на филмот е „Лоро“, италијански за „тие“, но и хомоним за Л’оро (злато).
Иако сите очекувања се дека тој ќе биде критички опис на светот на поранешниот италијански премиер, сепак пошироката идеја на Сорентино е истражување на моќта:
„Темата на моќта е насекаде“ изјави тој неодамна во интервју по повод новиот филм за Ла Република, „а Берлускони е концентрат на нетривијални мистерии. Всушност, моќниот човек е мистериозен по дефиниција - предвидливата моќ нема ефект врз нас“.
Сорентино и претходно се има занимавано со моќни мажи, како во филмот Il Divo (2009), биографска драма за поранешниот италијански премиер Џулио Андреоти, а во својот роман „Тони Пагода и неговите пријатели“ главен лик му е италијански политичар од десницата, со слични карактеристики како и контроверзниот Берлускони.
