Bookbox › Набрзинка

Почина актерот Рајан О'Нил

9 декември 2023

Холивудскиот актер Рајан О'Нил почина на 82-годишна возраст. Во 2001 му беше дијагностицирана леукемија, а во 2012 рак на простата.
Беше најпознат по улогата на Оливер Барет во „Љубовната приказна“ од 1970 година, каде глумеше со Али МекГроу, за што беше номиниран за Оскар и Златен глобус за најдобар актер во драма. Тоа водеше кон други големи хитови како „Зошто татко ти те пушта сама?“, „Месечина од хартија“, „Бери Линдон“ и „Возач“, но неговата слава почна да бледнее со доаѓањето на 1980-тите.
Неколку пати се женел, но најпозната е неговата долгогодишна врска со актерката Фара Фосет, која траеше од 1979 до 1997 и потоа повторно од 2001 до нејзината смрт во 2009. Неговата ќерка од првиот брак со Џоана Мур, Тејтум (поранешна сопруга на тенисерот Џон Мекинро) беше наградена со Оскар за „Месечина од хартија“ кога имаше само десет години.

извор

Иво Бару е победник на државното првенство во Катан и оди за Португалија

28 септември 2026

Вчера, 27 септември, Иво Бару ја освои титулата на „Државното првенство во Катан 2026“. Шампионатот се одржа во новоотворениот простор за друштвени игри „Рулбук“ во Скопје, а турнирот беше организиран од „Гоблин“. На масите се собраа 64 играчи, кои повеќе од десет часа се натпреваруваа за титулата најдобар играч на „Catan“ во земјава.
Победата има и дополнително значење бидејќи со неа Бару добива можност Македонија да ја претставува на европската сцена. Како национален шампион, тој ќе настапи на CATAN European Championship 2026, кое во ноември ќе се одржи во Португалија. Според официјалниот систем на CATAN, националните првенства се патот преку кој играчите се квалификуваат за меѓународните натпревари, а шампионите добиваат можност да се борат со најдобрите играчи од другите земји.
Иво има пишувано во нашата подрубрика Букбокс друштвени игри, осврт под наслов „Фотосинтеза или како да не бидеш 'дрво' за садење дрвја“.

извор

Чуму слобода?: фестивал Букстар од 28-30 септември во Скопје

23 септември 2026

Од 28-30 септември на повеќе локации во Скопје ќе се одржи 12-тото издание на фестивалот Букстар. Тој оваа година го отвора прашањето ЧУМУ СЛОБОДА? односно FREE AT LеAST?, инспирирано од зборовите на Мартин Лутер Кинг Јуниор: „Никој не е слободен сè дури сите не сме слободни“. Во време кога границите – видливи и невидливи – повторно се појавуваат околу нас, книжевноста останува простор во кој БАРЕМ мислата може да се движи без ограничувања, велат организаторите од издавачката куќа „Антолог“.
На 28 септември од 18:30 во Лабораториум ќе се одвива разговор со неколку македонски писатели со модераторката Фросина Пармаковска на тема „Од робот до четбот: дискусија за ерата што доаѓа“.
На 30 септември во Europe House во Скопје, со почеток од 16 часот ќе се одржи мал омаж во кој уредници на четири издавачки куќи и познавачи на творештвото на неодамна починатата иранска авторка Марџан Сатрапи ќе се осврнат на нејзиното творештво, а модератор ќе биде Ивица Дукоски. Истата вечер од 19 часот е предвиден разговор со Ѓузел Јахина, авторка на „Зулехја ги отвора очите: патување во еден книжевен универзум“.
Помеѓу гостите на фестивалот е и најчитаниот шпански автор Елој Морено. Во 2025 година, заедно со илустраторот Давид Сиера, тој ја објави „Новото патување на Малиот принц“, продолжение на „Малиот принц“. Покрај тоа, шпанскиот автор на 8 февруари 2025 година го собори Гинисовиот светски рекорд за најмногу потпишани книги во 12 часа, со неверојатни 11.088 потпишани книги.

Целосната програма и списокот на учесници се достапни на социјалните мрежи на Антолог.

извор