Овогодишните Иг Нобелови награди, кои се доделуваат за истражувања што истовремено забавуваат и поттикнуваат на размислување, за првпат во 35-годишната историја на наградата беа доделени надвор од САД – во Цирих, Швајцарија. Организаторите велат дека одлуката е поврзана со сè понепријателската атмосфера во САД кон науката и странците. Во последните години дел од добитниците избегнувале да патуваат во САД поради неизвесноста околу визите и имиграциските процедури. Сепак, организаторот Марк Абрахамс во преселбата гледа и можност за нов почеток, нова публика и пошироко европско присуство.
Суштината на Иг Нобеловите награди останува иста: да ги натераат луѓето да се заинтересираат за теми за кои инаку можеби никогаш не би помислиле дека се научно вредни. Така, овогодишната награда за физика ја доби тим што истражувал како да се спречи прскањето при користење писоар. Истражувачите ја проучувале механиката на течностите и утврдиле дека оптималниот агол на млазот за минимизирање на прскањето е помал од 30 степени. Потоа направиле и прототип на писоар кој го задржува тој оптимален агол без оглед на насоката од која се користи. Истражувачот Тад Траскот признал дека бил толку возбуден кога дознал дека ја добил наградата што за малку ќе се онесвестел.
Наградата за биомеханика е доделена на истражувачи кои се обиделе научно попрецизно да дефинираат што е бакнеж. Според нивната дефиниција, станува збор за ненасилна интеракција меѓу припадници на ист вид, со директен контакт уста со уста, движење на усните и без пренесување храна. Ваквата навидум бизарна дефиниција им овозможила да ја проучат еволутивната историја на бакнувањето кај различни видови.
Истражувачите заклучиле дека бакнувањето се појавува кај повеќето денешни големи мајмуни, а веројатно постоело и кај неандерталците. Тие дури претпоставуваат дека раните современи луѓе и неандерталците можеби се бакнувале. Следниот пат кога ќе бакнете некого, велат истражувачите, можете да си помислите дека учествувате во традиција стара околу 21,5 милиони години.
Наградата за економија оди кај истражување кое покажало дека луѓето од повисоките општествени слоеви почесто земаат слатки од скришно оставена залиха наменета за деца. Наградата за медицина е доделена за истражување на аеродинамиката при дување на носот.
Како и секоја година, добитниците добиваат и необична статуетка. Овојпат таа е во форма на парче сино сирење на кое има стапало од кое никнуваат печурки, во чест на пошироката тема на годинашните награди – габите. Добитниците добиле и парична награда од 10 трилиони зимбабвески долари, валута која одамна практично нема вредност.
