Kejт Буш нема настапувано во живо цела деценија, а последно парче музика објави во далечната 2011. И во новиот, краток филм под наслов „Малата ријачка“ (цицачи што личат на глувци но имаат уста издолжена во форма на рилка), кој е во нејзина режија и во кој се користени и нејзини цртежи, музиката е базирана на постара композиција, „Сноуфлејк“ од албумот „50 зборови за снег“ - дует со нејзиниот син Берти.
Насловот на филмот се однесува на украинскиот вид ријачка или ровчица (украинска џуџеста ровчица) која се обидува да се пробие низ бурата од руски напади. Еден од бомбардираните објекти е анимирана фотографија на Максим Левин, украински фотограф убиен во конфликтот.
Филмот веќе освои награда за најдобра анимација на Фестивалот за кратка анимација во Њујорк, што е значајно признание за дебитантското остварување на Буш. Филмот е четириминутно визуелно патување низ разурнат град, претставено во монохроматска, мрачна атмосфера, што придонесува за неговата моќна порака.
Буш објасни дека филмот бил инспириран од војната во Украина и е метафора за децата погодени од конфликти. Таа првично размислувала за девојче како главен лик, но сфатила дека ранливото животно би предизвикало подлабока емпатија кај публиката. Патувањето на ријачката осветлено од месечината низ опустошениот град, водено од духовно чувство на надеж, претставува потрага по смисла и борба за опстанок во време на војна.
