Здраво Трендо,
Ти пишувам во врска со една партија ШАХ(та), која институциите ја играат веќе една недела во општина Центар.
Сите знаеме дека шахот е игра во која секој потег е важен. Особено кога противникот е опасност која демне пред основно училиште.
Во Капиштец, една пропадната шахта веќе една недела игра шах со институциите. Таа направи потег. Институциите возвратија. И сега партијата тапка во место.
Еве како течеше играта:
31 август. Ден пред почетокот на учебната година. Пред ООУ „Киро Глигоров“ забележувам пропадната шахта. Отворена, длабока и доволно опасна за човек да не сака да дознае што има под неа.
1 септември. Прв училишен ден. Пред училиштето врие од деца, родители, наставници… А шахтата и понатаму зјае. Практично, го чека својот прв ученик. Иронијата да биде поголема, токму тој ден во училиштето се сите медиуми, бидејќи има обраќање на министерката за образование и наука. Значи, идеална прилика институциите да ја забележат шахтата. Ако не друго, барем некој новинар да и се закачи.
Решавам да ја фотографирам и да ја објавам на социјалните мрежи. По половина час инстуциите го прават првиот потег. Пуштаат еден пион со ваљак, со параван, полно наоружување! Ја оградува шахтата, а ваљакот го паркира веднаш до неа.
По некое време, медиумите си заминуваат. А веднаш потоа, пионот се повлекува, заедно со ваљакот и целата опрема. Шахтата останува. Оградена. Непоправена.
7 септември. Секој ден малата ја оставам на училиште и чекам потег од институциите. Шахтата сè уште е таму. Оградена, но несанирана, па полека почнува да служи и како импровизирана депонија.
Во шахот, кога противникот нема каде да оди, следува мат.
И тука следува едно многу логично прашање: Дали чекаме да биде матирано некое невино детенце? Па потоа некој од коњите во институциите да наоѓа оправдание зошто партијата е изгубена?
Поздрав,
Дејан
П.С. Ич топов не ме боли кој е надлежен за ова, дали е тоа градот или општината, информирани се и едните и другите.
Поздрав,
Дејан
