МЗТ го загуби трилерот во Пионир против Партизан

Со поените на Буниќ, Луковиќ и Дреновац, МЗТ Скопје во раната фаза од мечот поведе 11-6. Брзо потоа одбраната на Металците направи неколку пропусти, по што домаќините прават серија 6-0 и поведуваат 12-11. Повратникот на клупата Алеш Пипан повика тајм-аут и прописно им се изнавика на своите играчи (на Дреновац поради грешката во чекори).

 

Екипите се менуваа во водство во првата четвртина, која што на крајот ја добија Металците 23-25, со поените на Луковиќ со сирената (8 поени и 2 скока за 10 минути). Аеродромци имаа 5/7 за три поени во првиот квартал.

 

Партизан ниту во втората четвртина немаше решение за Луковиќ, кој веќе во 17-та минута беше двоцифрен. Со петтата тројка од осум обиди, МЗТ стигна до највисокото водство на мечот 33-27. Во моментите кога Партизан се обидуваше да се врати резултатски, Алеш Пипан викаше тајм-аут и неговите избраници ја задржаа концентрацијата.

Со седмата тројка од 10 обиди (Дреновац 3/3, Дамјан Стојановски 2/2), МЗТ Скопје го затвори првото полувреме со 49-38. Речиси совршено полувреме за Штрковите, иако загубија девет топки. Дамјан Стојановски беше најефикасен во првиот дел со 11 поени, 10 постигна Луковиќ, а 9 Дреновац. Кај Партизан, младиот Вања Маринковиќ уфрли 9 поени.

 

Безидејната игра на белградскиот состав, МЗТ ја казнуваше со брзи контранапади.

 

Со 14-от поен на Вања Маринковиќ, Партизан ја преполови предноста на МЗТ кој не реализираше дури четири напади по ред. Пипан повторно бесно реагираше на тајм-аутот, а Црно-белите само ја зголемија агресивноста и заслужено ја добија третата четвртина 17:12. Андреј Магдевски имаше три неверојатни банани само во третиот период.

Одличниот шут од дистанца на Дамјан Стојановски повторно го однесе МЗТ на 9 поени предност на 7 минути пред крајот (57-66). Сепак, повредата на Марко Љубичиќ како да го деконцентрираше скопскиот состав кој му овозможи на Партизан да се врати на -3 (63-66).

 

Марко Симоновски имаше шут за продолжене но промаши и Партизан славеше со 72:69.

 

Во следното коло кошаркарите на МЗТ веќе во петок играат против Мега Лекс на Предраг Самарџиски. На табелата, Металците се четврти со 4 бодови.