Носителот на куп трофејот и домаќин на турнирот годинава, МЗТ Скопје потешко од очекувањата го отвори полуфиналниот меч против Кожув.
Гостите од Гевгелија, охрабрени од победата против „металците“ во првенството заиграа без респект и по првите десет минути водеа 16:18. За разлика од прецизниот шут во дербито против Работнички, аеродромци вечерва немаа „мека рака“ и во првата четвртина имаа четири промашувања за три поени.
Кожув ја одржуваше предноста од четири поени и во втората четвртина, а МЗТ не му дозволи на гостинот да се одлепи, благодарение на Стефан Синовец, кој по првото полувреме имаше 16 поени (2/2 за три).
Рамномерно и изедначено се играше и на стартот од второто полувреме, иако МЗТ Скопје го отвори тој период со брзи поени 5:0 и поведе 40:34. Следуваа неколку тројки на двете страни (Шепа, Лучиќ и Синовец), и по 30 минути на семафорот стоеше 59:55.
Кожув не се предаваше и со тројката на репрезентативецот Владимир Брчков во 33. минута израмни на 62:62.
Во неизвесна завршница, Филип Шепа загуби топка, а Шеховиќ од контра поентираше под фаул и МЗТ поведе 72:68. Албијаниќ со 13-от поен го доведе Кожув на минус два на 56 секунди пред крајот. По тајм-аутот на Алек Јончевски, Дион Диксон промаши од дистанца за два, а на другата страна Дунџерски од слободни фрлања израмни 72:72.
Драмата следуваше на 19 секунди пред крајот, кога Кожув имаше последен напад. Шепа ја поведе акцијата, а Миладин Пековиќ постигна тројка во последната секунда и Кожв славеше 75:74! Гевгеличани за првпат се пласираа во едно финале, каде ќе играат против победникот од дуелот Работнички - Куманово.
Најефикасен на мечот беше Стефан Синовец со 27 поени, Самарџиски додаде 13 со 8 скокови. Во победничкиот состав, Брчков го заврши мечот со 14, Албијаниќ со 13, а Пековиќ уфрли 11 поени.
