Германскиот фудбалски репрезентативец Робин Гозенс кој се прослави во Аталанта, неодамна изјави дека многу го погодил ладниот однос на Кристијано Роналдо.
Гозенс има 26 години, игра лев бек и лево крило за Аталанта, а пред неколку дена даде интересна изјава.
„После мечот со Јувентус пробав да ја остварам мојата голема желба - да добијам дрес од Роналдо. После судиската свирка за крај му пријдов, дури не ни славев со соиграчите. Го прашав: „Кристијано, може ли да ги смениме дресовите?“ Тој не ме ни погледна и само рече: „Не“.
Се посрамив, поцрвенев. Си отидов, почувствував мал. Го знаете оној момент кога ќе се случи нешто срамно и гледаш на страна да не приметил некој? Е така се почуствував, пробав да го сокријам тоа“, раскажал Гозенс за одбивниот однос на Роналдо.
Станува збор за момент по мечот во Купот на Италија во 2019-та кога Аталанта со 3:0 го прегази Јувентус а Кристијано, познат по тоа што не сака никогаш да губи, бил лут и револтиран.
Но ситуацијата на Гозенс му ја исправиле барем малку другарите од Аталанта Ремо Фројлер и Ханс Хатебур кои му поклониле дрес од Роналдо.
