Off Topic

Некои луѓе имаат време. И тонер.

Еден обожавател на филмската франшиза „Дина“ испечатил 240 постери со кадри од својот омилен филм и ги поставил по прецизен редослед покрај еден пат. Зошто? За кога некој ќе помине со возило покрај овој дел со одредена брзина, статичните слики покрај патот да му се спојат во течна анимација и „да му направат филм“. Океј.

Водич за пиење од Леми Килмистер

Уште во 2005 година, пејачот и фронтмен на Моторхед, Леми Килмистер, во интервју даде неколку тешко стекнати совети за пиење алкохол. Тој отсекогаш важеше за исклучително веродостоен извор по ова прашање. Има тука неколку интересени цаки.

Новиот српски парламент има пратеник со боенка

Во новиот состав на парламентот на Србија има осум глумци, пола од кај студентите, пола од кај Вучиќ. Еден од кај студентите е и актерот Бојан Димитријевиќ, познат како наркоманот Пикац од серијата „Вратиће се роде“. На првиот ден на новата работа земал боенка, за кога ќе му биде досадно. Симпатично, ако човек заборави дека се колнеа како 24/7 неуморно ќе се борат со криминалниот октопод на претходната власт.

„Подобрата Србија“ демонстрира простаклук

Група победнички бадијалџии се собраа пред зградата на српскиот парламентг каде се одржува конститутивна седница на новиот парламентарен состав. За да им аплаудираат на своите и да викаат „уаа“ на другите (јаки потези, јаки герили). Најглупата меѓу нив ја потури со јогурт по глава актерката Лидија Вукиќевиќ која има мандат од СНС.

ВИ музиката ги доби своите Греми

Во Лос Анџелес биле одржани првите AI Music Awards за музика креирана со вештачка интелигенција. Распоредени во 25 музички жанра и три категории: скроз ВИ, делумно ВИ и хибридни песни во кои вокалот е на клониран човечки глас. Влез за настанот бил 250 долари. Ги имаме победниците. Некако ни немаат душа :)

Политичар е за да те фарба

Во 2021 година, локални политичари во изборна кампања решаваат да им покажат на своите гласачи дека тие се луѓе од народот па наместо само ветувања, да демонстрираат дека се подготвени конкретно да им помагаат на луѓе. На пример, да освежат со боја фасада на една скромна куќа, па удираат ваљак, се разбира, пред камери и новинари. Да ја видите куќата пет години подоцна.

Грчкиот јазик кој исчезнува

Луѓе што живеат во села од разбиен тип развиваат еден свиркачки јазик кој им помага во меѓусебното комуницирање а им штеди енергија и километража. Имавме за Турција, еве ја сега и Грција. Легендата вели дека во Галичник обидите со свиркање да побараш нешто од комшијата замреле затоа што секој свиркачки одговор гласел: Немам. 

Хонг Конг, нешто како студентски дом

Скај парк е хонкошки солитер за заедничко домување на млади луѓе, оние кои би да ја споделат живеачката со други. Треба само да имаат желба за таков живот и 3.400 долари за месечна кирија.

Што не се кажува на жена во бурка

Неколку отракани жени во бурки се зезаат со стереотипите за нивниот изглед со кои секојдневно се среќаваат. На пример кога некој ќе ги праша: „А што тоа криеш?“, а неа ѝ доаѓа да одговори: „Експлозив“.

Тренинг за каскадери

По сето тоа што го видовме од него во овие 2 минути, и тоа што го видовме од себе во последниве над 30 и кусур години, неизбежен е заклучокот дека не е можно да сме од ист вид со овој човек. Инаку Словенец е, и се вика Томи Михичинац.

29-те најбрзи времиња истрчани на 100 метри

Нема сомнеж дека Усаин го држи првото и најбрзо време што некогаш е истрчано на 100 метри. И второто и третото. На списокот има и една дополнителна "функционалност", прешкртани се времињата на сите трчачи што биле фатени дека се допингуваат.

Вистината од Инстаграм фидот

20-годишна финска блогерка му се обраќа на делот од женската популација што уште ја нема совладано вештината за ловење совршен агол и на крајно неупатената машка маса, за да ги просветли околу тоа што го гледаат на Инстаграм (и за да не се извадат од памет ако по некоја случјаност истото тоа после го видат во живо).

За манекенцките работи

Некако и пред да ги видиме овие акробации знаевме дека не сме ние за манекенскиот бизнис. Сега сме апла сигурни.

Фајрфокс сенд, сервис за големи фајлови што не сакаш многу да се шират

Сервис на Мозила што ти дава да аплодираш фајлови до 1 гига кај нив на сервери, по пат да ги енкриптира и да ти даде линк до тоа што си аплоудирал. Паранојата околу безбедноста и таинственоста на фајлот, освен со енкрипција, се смирува и со тоа што тој може да биде симнат само еднаш, а по симнувањето или максимум 24 часа по аплоудирањето, секоја трага од него автоматски се брише од серверите на Мозила.

До размазувањето и по него

Сè тоа е слатко и убаво кога како гест на бескрајна милост кон своето дете решаваш да истетовираш тетоважа што тој / таа ја нацртало. Проблемот е кога по вакво нешто на истото ова дете треба да му се истопориш како авторитет и да му кажеш - изеди тоа грашокот.

Правила за справување со руски падобранци

Прво правило: Избегнувај руски падобранци на Денот на падобранецот.

Второ правило: Ако на Денот на падобранецот налеташ на руски падобранец, прочитај го првото правило.

Кога пијаниот ќе си најде банкомат

Едно фино ниво на пијанство е, да речеме, кога нема да влезеш на утакмица на Сан Сиро пошто ти увалиле фалц карта, па се олешиш заради тоа па таков размонтиран влезеш во миланско такси и на шоферот му кажеш: „Вози до Драмски“. Ова нема везе со тоа, ама за слични промили се работи.

Животни лекции од Алан Форд

Компилација мисли (спремни за твитови, мемиња, статуси) од Алан Форд, Боб Рок, Грунф и останато друштво. За тие што не знаат, автори на Алан Форд се Макс Бункер (пишува) и Магнус (црта), и сето ова се случува во Њујорк (и како може да си дозволите тек сега да се запознавате со материјалот?).

Што ако Епл беше држава

Државата ќе има 116 илјади жители (бројот на вработени на Епл), а по приходи ќе биде нешто подобра од БДП-то на Виетнам (203 милијарди долари). По оваа математика секој од овие 116 илјади инстантно ќе добие чек од 380.000 долари.

Мезето обединува

Единствен момент кога ајкула не е заинтересирана да изеде фока или туна, е кога сите три му се намерачени на многу поситен и помалку проблематичен плен. Дури и на китот не му пречи да се вклучи во вака нефер разнебитувањето на јато сардини.

Пешачење сред небо

Не е вест кога ќе се отвори 500 метри долг мост. Вест е кога ќе се отвори 500 метри долг висечки мост, на 85 метри над земја и кој може да се пројде само пешки. Моментално ова е најдолгиот пешачки мост на светот и се наоѓа во близина на швајцарски Цермат.

Сите с(м)е исти

Националната припадност кај човек создава една варлива самоувереност која најчесто непроверено седи на ставот дека си 100% чист Македонец, Србин, Исланѓанин, Курд, Бразилец или што и да е. И сето тоа одлично те служи затоа што таа непровероност беспрекорно ти помага во формирање на своите глупи омрази кон другите (не дека ако си со докажано потекло имаш оправдание за својата омраза). Да се разбереме, ништо не е 100% и ништо не е така чисто. И тоа не е лошо.

Хајлајтс од првиот Дрим тим

Не сте вие стари, ама Дрим тимот наполни 25 години. Во негова чест ФИБА објави компилација од најдобрите моменти од првиот натпревар на првиот Дрим тим. Потсетување како изгледаше неговиот состав: Џордан, Меџик, Бирд, Јуинг, Баркли, Мелоун, Стоктон, Пипен, Робинсон, Малин, Дрекслер.

Драчевски "Брејкинг бед"

Царина / полиција запленува пратка кромид полн со дрога. Прво прашање: како воопшто на некој му текнало ова? Второ, подеднакво важно, прашање: како некој воопшто го извел ова? Бонус: како ги фатиле (ако не се искодошени)?

Готвиме со Јапонки

Рецептот е за ракчиња, состојките ги имате внатре, времето за готвење е 3 секунди. Во овие 3 секунди е целата јапонштина што може да собере една реклама.

Технологија, затоа што домашното воспитување не успеа

Не можејќи да го трпат отпадот што им се лепи по раце, нозе и даски за сурфање, двајца сурфери седнуваат и изработуваат автоматска канта за чистење ѓубре од море / океан. Е сега, кога момциве би направиле исти вакви канти што ќе можеме да ги пуштиме по копно и да жнеат ѓубре во Градски парк, на кеј, на кеј ГТЦ, на Водно, на булевар, покрај пат на семафорите пред Стража, на автобуска, сме решиле 7 од бескрајната низа начини на кои успеваме да ја изгнасиме околината во која живееме.

Момците што ги измислија сите здрави јадења во последнава деценија

Ок, целиот скеч е пародија, ама може да пројде само затоа што целата индустрија за супер-лековити-магично-здрави јадења е смешка (што заработува милијарди долари годишно).

Една изгужвана снимка од Скопје по земјотресот

Во катастрофата загинуваат од 1000 до 1100 луѓе, а паралелно со нив најголема нечовечка жртва е старо Скопје. Инаку станува збор за приватно видео снимено вон сите тогашни телевизиски репортажи (аудиото е подоцна додадено).

Како изгледа кога ќе ти успее сè што си замислил (на билјард)

Магичноста на ова што ќе го направи играчов најдобро е доловена од коментаторот на натпреварот: "Може да се убијам ако мене некој ми го направи ова."

Видео што нема да ви одмогне во живот

Да не бидеме премногу амбициозни дека ова нешто сериозно ќе ви смени во живот. Ваше е кога ќе решите да го послушате и практикувате ова што ви го кажува, негово е да ви каже 5 фори за чистење кујна. Пред употреба, да се купи многу оцет, сода бикарбона и лимон.